ភ្នំពេញៈ មន្ត្រីសមត្ថកិច្ចចម្រុះរបស់អាជ្ញាធររាជធានីភ្នំពេញ បានសម្រេចដោះលែងក្រុមជនរងគ្រោះដោយសារគ្រឿងញៀនចំនួន២៣៥នាក់ ដែលសមត្ថកិច្ចបានឃាត់ខ្លួនយកមកធ្វើការអប់រំ និងបន្សាបសារធាតុថ្នាំញៀនដែលផ្ទុកក្នុងខ្លួន នៅក្នុងមជ្ឈមណ្ឌលឪកាសខ្ញុំ ដែលមានទីតាំងនៅភូមិសំរោង កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៦។

សមាសភាពមន្ត្រីដែលចូលរួមក្នុងពិធី ធ្វើសមាហរណកម្ម យុវជនយុវនារីនោះ រួមតំណាងមន្ត្រីតុលាការអភិបាលខណ្ឌសែនសុខ អភិបាលខណ្ឌទួលគោក អភិបាលខណ្ឌព្រែកព្នៅ ប្រធានមជ្ឈមមណ្ឌលឱកាសខ្ញុំ​ រួមទាំងព្រះសង្ឃផងដែរ។ ក្រុមមន្ត្រីទាំងនោះបាន ណែនាំដល់ក្រុមយុវជនទាំងអស់ថា ត្រូវខិតខំកសាងខ្លួនឲ្យបានល្អដើម្បីអនាគតខ្លួនឯង និងគ្រួសារ ក៏ដូចជួយសង្គមជាតិយើងផងដែរ ព្រោះយុវជនជាទំពាំងស្នងជាតិ ជាសសរទ្រូងរបស់ជាតិយើង បើសសរទ្រូងជាតិយើងរឹងមាំ ប្រទេសជាតិនឹងសុខសប្បាយ។

ទោះបីជាយ៉ាងណា ក្រុមមន្ត្រីបានសំណូមពរ និងព្រមានដល់យុវជនទាំង២៣៥នោះមិនឲ្យធ្លាក់ខ្លួនចូលក្នុងអន្ទាក់ថ្នាំញៀនម្តងទៀតឡើយ​ ហើយថា​ មជ្ឈមណ្ឌលមិនទទួលអ្នកជាលើកទី២ទ គឺត្រូវដាក់ពន្ឋនាគារវិញ បើនៅតែមិនកែប្រែទៀតនោះទេ។

បន្ទាប់ពីក្រុមមន្ត្រីបានផ្តាំផ្ញើ និងណែនាំពួកគេឲ្យងាកមករកផ្លូវល្អរួចមក ព្រះសង្ឃក៏បានមកសូត្រធម៌ប្រោះព្រំទឹកមន្ត ដល់ពួកគេឲ្យឧបទ្រុបចង្រៃចាកចេញឆ្ងាយ និងនាំមកនូវសិរីសួស្តី សុខសប្បាយ​ អនាគតភ្លឺស្វាងចាប់ពីពេលនេះតទៅ៕