ស្វាយរៀង: អគ្គិភ័យមួយបានលេបត្របាក់ផ្ទះអស់មួយខ្នង សល់តែគ្រោងឆ្អឹង រីឯទ្រព្យសម្បត្តិឆេះអស់ក្លាយជាផេះគិតជាប្រាក់ជិត១ម៉ឺនដុល្លារ ដោយសារតែការឆ្លងចរន្តអគ្គីសនី។ ហេតុការណ៍នេះបានកើតឡើងកាលពីវេលាម៉ោង៣រសៀលថ្ងៃទី១៥ ខែវិច្ឆិកា ឆ្នាំ២០១៦ ស្ថិតនៅក្នុងភូមិតាប៉ ឃុំតាសួស ស្រុកស្វាយជ្រុំ ខេត្តស្វាយរៀង។

បើតាមសមត្ថកិច្ចនគរបាលស្រុកស្វាយជ្រុំបានឲ្យដឹងថា ផ្ទះប្រជាពលរដ្ឋដែលត្រូវបានអគ្គិភ័យលេបត្របាក់ខាងលើនេះ សង់អំពីឈើទំហំ៦ម៉ែត្រ គុណនឹង ៧ម៉ែត្រ សរសរបេតុង ដំបូលប្រក់សង្ក័សីជញ្ជាំងក្តា ដោយមានម្ចាស់ផ្ទះឈ្មោះ ឡុង មឿន ភេទប្រុស អាយុ៥៨ឆ្នាំ នៅស្នាក់នៅក្នុងភូមិខាងលើ។

សមត្ថកិច្ចបន្តទៀតថា អគ្គិភ័យនេះដែរក៏បានបណ្តាលឲ្យមានការខូចខាតទ្រព្យសម្បត្តិ ជាច្រើនរួមមាន សំលៀកបំពាក់ មុងកន្ទេលខ្នើយ ចានឆ្នាំង ទូរទស្សន៍ ស្រូវអង្ករ ប្រាក់ដុល្លារចំនួន៦៥០០ដុល្លារ និងសម្ភារ:ប្រើប្រាស់មួយចំនួនទៀតគិតជាទឹកជាង២ម៉ឺនដុល្លារ ហើយមូលហេតុនេះការឆាបឆេះនេះ គឺបណ្តាលមកពីការឆ្លងចរន្តអគ្គិសនី (ផ្ទុះសេខ្សែភ្លើង) ខណ:ម្ចាស់ផ្ទះមិននៅចេញទៅស្រែអស់ ទម្រាំអ្នកជិតខាងឃើញភ្លើងឆេះខ្លាំងទៅហើយ រីឯរថយន្តអគ្គីភយ័ស្នងការដ្ឋាននគបាលខេត្តចំនួនមួយគ្រឿងក៏បានទៅជួយអន្តរាគមន៍ដែរប៉ុន្តែមិនអាចទប់ស្កាត់ស្ថានការណ៍បាននោះទេ ដោយសារតែទំហំនៃការឆាបឆេះខ្លាំងពេក៕