តាកែវៈ មុខសញ្ញាចោរលួចដ៏ប្រហើនម្នាក់ ត្រូវបានសមត្ថកិច្ចនគរបាលស្រុកបាទី សហការជាមួយកម្លាំងអាវុធហត្ថ ឃាត់ខ្លួនបាន នៅព្រឹកថ្ងៃទី១៧ ខែវិច្ឆិកា ឆ្នាំ២០១៦បន្ទាប់ពី ធ្វើសកម្មភាពគាស់ផ្ទះលក់គ្រឿងសំណង់ នៅមុខសាលារៀនស្មៅខ្ញី ស្ថិតក្នុងភូមិស្មៅខ្ញី ឃុំត្រពាំងសាប ស្រុកបាទី ខេត្តតាកែវ យកសម្ភារៈអស់ជាច្រើន កាលពីយប់ថ្ងៃទី១៦នេះ។

លោកវរសេនីយ៍ ង៉ាន់ សារី អធិការនគរបាលស្រុកបាទីបានឲ្យដឹងថា ចោរគាស់ផ្ទះលក់គ្រឿងសំណង់ និងលក់ស្រាបៀរ ចាប់ខ្លួនបានហើយ គឺឈ្មោះ សែ រដ្ឋា ភេទប្រុស អាយុ២៩ឆ្នាំ មានទីលំនៅភូមិព្រែកខ្សេវ ឃុំរការខ្ពស់ ស្រុកស្អាង ខេត្តកណ្តាល។ ជនសង្ស័យត្រូវបានចាប់ខ្លួនខណៈយកសម្ភារៈលួចបានមកថ្លុងចោលក្នុងវត្តអង្គសឹង្ហ ឃុំចំបក់ ស្រុកបាទី ហើយព្យាយាមជិះម៉ូតូគេចខ្លួន ត្រូវកម្លាំងនគរបាលស្រុកដេញចាប់ខ្លួនបាន នៅវេលាម៉ោង៨ព្រឹក ថ្ងៃទី១៧ វិច្ឆិកានេះ។ លោកបន្តថា ជនសង្ស័យបានសារភាពថា ខ្លួនតែម្នាក់ឯងដែលបានធ្វើសកម្មភាពគាស់ផ្ទះលក់គ្រឿងសំណង់ផ្ទះលក់ស្រាបៀរនៅស្រុកបាទីចំនួន៣កន្លែង និងនៅស្រុកស្អាង១កន្លែង។ នៅក្នុងស្រុកបាទី រូបគេធ្វើសកម្មភាពគាស់ផ្ទះលក់គ្រឿងសំណង់មុខសាលារៀនស្មៅខ្ញី និងផ្ទះលក់ស្រាបៀរនៅជាប់គ្នា។ ឯមួយកន្លែងទៀត គាស់ផ្ទះលក់ប្រេង សាំងនៅខាងកើតវត្តអង្គសឹង្ហ។ ជនសង្ស័យសារភាពទៀតថា រាល់សម្ភារៈដែលរូបគេលួចបាន ដូចជាស្រាបៀរ គឺដឹករ៉ឺម៉កម៉ូតូទៅលក់ឲ្យផ្ទះលក់គ្រឿងចាប់ហួយនៅមុខផ្សារសំរោងយោង ឯសម្ភារៈគ្រឿងសំណង់យកទៅលក់ឲ្យផ្ទះលក់គ្រឿងសំណង់នៅម្តុំវត្តអង្គសឹង្ហ និងមុខក្លោងទ្វារចូលវត្តអង្គរុនស្រុកបាទី ហើយមួយចំនួនទៀត ទៅលក់នៅម្តុំផ្សារដើមអំពឹលស្រុកកណ្តាល ស្ទឹងខេត្តកណ្តាល។

លោកវរសេនីយ៍ ឃុតឡូអធិការរងទទួលបន្ទុកព្រហ្មទណ្ឌបានឲ្យដឹងថា សម្ភារៈដែលជនសង្ស័យលួចយកទៅនោះ រកឃើញ និងដកហូតបានមកវិញខ្លះៗ ហើយសមត្តកិច្ចជំនាញកំពុងបន្តនីតិវិធីតាមផ្លូវច្បាប់។ លោក បានបញ្ជាក់ឲ្យដឹងបន្តថា នគរបាលស្រុកបាទីពិសេសជំនាញព្រហ្មទណ្ឌ បានយកចិត្តទុកដាក់យ៉ាងខ្លាំងលើកិច្ចការរក្សាសន្តិសុខសណ្តាប់ធ្នាប់ជូនប្រជាពលរដ្ឋ តែលោកក៏សុំការយោគយល់ពីបងប្អូនប្រជាពលរដ្ឋដែលពេលខ្លះ សមត្តកិច្ចមិនអាចឆ្លើយតបបានវិញភ្លាមៗបាន ព្រោះត្រូវការស៊ើបអង្កេតកំណត់មុខសញ្ញាឲ្យបានច្បាស់លាស់ដើម្បីធ្វើការចាប់បង្ក្រាប។ ដូចករណីគាស់ផ្ទះលក់គ្រឿងសំណង់ បន្ទាប់ពីទទួលបានពាក្យបណ្តឹងភ្លាមកម្លាំងជំនាញបានបើការស៊ើបអង្កេតកំណត់មុខសញ្ញាជនសង្ស័យធ្វើការស្រាវជ្រាវ ក៏ចាប់បានជនប្រព្រឹត្តផ្ទាល់តែម្តង។

សូមរំឭកថា ប៉ុន្មានថ្ងៃនេះ នៅស្រុកបាទីមានករណីចោរគាស់ផ្ទះលក់គ្រឿងសំណង់លក់ស្រាបៀរចំនួន៣កន្លែង។ ក្នុង៣ទីតាំងនោះ គឺផ្ទះលក់គ្រឿងសំណង់នៅមុខសាលារៀនស្មៅខ្ញីយីហោរដ្ឋាវ៉ារីត្រូវចោរចូលធ្វើសកម្មភាព៤លើក។ លើកទី៤នេះ ចោរធ្វើសកម្មភាពគាស់ជញ្ជាំងចូលទៅក្នុងផ្ទះ ហើយយកមេសោចាក់ទ្វារបន្ទប់ពីខាងក្រៅជាប់ទើបប្រមូលយកសម្ភារៈគ្រឿងសំណង់ដឹកចេញ ក៏ត្រូវកម្លាំងសមត្តកិច្ចនគរបង្ក្រាបបានតែម្តងនៅព្រឹកថ្ងៃទី១៧ ខែវិច្ឆិកា ឆ្នាំ២០១៦នេះ៕