កណ្តាលៈ អ្នកភូមិរាប់រយគ្រួសារស្នើសុំឱ្យអាជ្ញាធរអគ្គិសនីជួយផ្តល់បង្គោលភ្លើង ដើម្បីបញ្ចៀសគ្រោះថ្នាក់ជាយថាហេតុ ត្បិតបង្គោលចាស់ពុកផុយអស់ទៅហើយ និងរអ៊ូរទាំពីកង្វះទឹកស្អាតប្រើប្រាស់។ លោកតា នៅ នឹម អាយុ៨២ឆ្នាំ និងលោក អ៊ូច បូ រ៉ា តំណាងប្រជាពលរដ្ឋបានប្រាប់ថា សព្វថ្ងៃនេះប្រជាពលរដ្ឋរស់នៅក្នុងភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ប្រមាណជា២០០គ្រួសារ។
ចាប់តាំងពីចំណុចសំណង់ផ្ទះល្វែងក្រុមហ៊ុន ហេង គង់ ទៅដល់ចំណុចគល់ស្ពានដែកព្រែករាំង គឺមានការលំបាក់ណាស់ ដោយសារតែខ្វះបង្គោលអគ្គិសនី ហើយបង្គោលភ្លើងដែលប្រើប្រាស់រាល់ថ្ងៃនេះ គឺជាបង្គោលឈើដែលអ្នកភូមិរៃប្រាក់គ្នា ដើម្បីទិញយកមកដាក់ ហើយក៏កាន់តែចាស់ណាស់ទៅហើយដែរ។ ពួកគាត់មានការព្រួយបារម្ភនៅពេលមានភ្លៀង ខ្យល់ ម្តងៗ ខ្លាចបាក់បណ្តាលឱ្យដាច់ខ្សែភ្លើង នាំឱ្យឆក់ដល់អ្នកធ្វើដំណើរ អ្នកភូមិ ក៏ដូចជាក្មេងៗជាដើម។
ពួកគាត់បានបន្តថា ជារៀងរាល់ឆ្នាំ ប្រជាជនតែងតែរៃអង្គាសលុយគ្នា ដើម្បីទិញបង្គោលថ្មីមកផ្លាស់បង្គោលចាស់ ហើយតែងធ្វើដូច្នេះជាង១០ឆ្នាំមកហើយ ហើយក៏មានការងឿងឆ្ងល់ដែរថា ដីចម្ងាយប្រមាណជាង២០០ម៉ែត្រសោះ ហើយបើប្រើបង្គោលទៀតសោតប្រមាណតែ៥ដើមប៉ុណ្ណោះ ហេតុអ្វីបានជាអគ្គិសនីមិនដាក់ឱ្យ។ បើនិយាយពីរឿងធ្វើសំណើវិញនោះ បើផ្តិតមេដៃវិញស្ទើរតែសឹកក្រយ៉ៅដៃអស់ហើយដែរ គឺធ្វើជារៀងរាល់ឆ្នាំ ប៉ុន្តែ មិនដែលទទួលបានការឆ្លើយតបនោះឡើយ។ ផ្ទុយទៅវិញ សំណង់ផ្ទះល្វែងរបស់ឈ្មួញនៅពីមុខផ្លូវចូល គ្រាន់តែចាប់ផ្តើមគម្រោងសាងសង់ ស្រាប់តែមានបង្គោលភ្លើង? ទន្ទឹមហ្នឹងនោះ ពួកគាត់ក៏សូមសំណូមពរទៅដល់អាជ្ញាធរស្រុក/ខេត្ត មេត្តាអន្តរាគមន៍ជួ យដើម្បីទទួលបានបង្គោលភ្លើងរឹងមាំផង។
ដោយឡែកលោក អួន សំណាង មេភូមិរាំង បានទទួលស្គាល់ថា ប្រជាពលរដ្ឋដែលរស់នៅតំបន់ខាងលើពិតជាកំពុងជួបការលំបាកខ្វះបង្គោលអគ្កីសនីពិតមែន ហើយពាក់ព័ន្ធហ្នឹងបញ្ហានេះ ក្នុងនាមអាជ្ញាធរភូមិ សង្កាត់ ក្រុង ក៏ធ្លាប់បានដាក់សំណើទៅអាជ្ញាធរអគ្គិសនីកម្ពុជាច្រើនលើកច្រើនសារមកហើយដែរ ប៉ុន្តែឃើញតែចុះមកពិនិត្យរួចក៏បាត់ឈឹងទៅវិញទៅមិនដឹងថា មកពីមូលហេតុអ្វីនោះទេ។ លោកបានបន្តថា ក្រៅពីកង្វះខាងបង្គោលភ្លើង នៅក្នុងភូមិរបស់លោក ប្រជាពលរដ្ឋប្រមាណ៧០ភាគរយ ក៏មិនទាន់មានទឹកស្អាតប្រើប្រាស់នៅឡើយដែរ គឺប្រើទឹកអណ្តូង នាំឱ្យប្រឈមហ្នឹងបញ្ហាសុខភាព ដោយសារតែទឹកអណ្តូងមានជាតិកំបោរច្រើន មិនអាចយកទៅហូប ឬដាំស្លនោះទេ។ ជាហេតុធ្វើឱ្យប្រជាពលរដ្ឋបង្ខំចិត្តទិញទឹកបរិសុទ្ធមកមកហូប និងដាំ ស្ល ធ្វើឱ្យកាន់តែប៉ះពាល់ដល់ជីវភាពរស់នៅប្រចាំថ្ងៃ ហើយក្នុងនាមមេភូមិ លោកក៏សូមអំពាវនាវឱ្យថ្នាក់លើមេត្តាគិតគូរដល់កង្វល់របស់ពលរដ្ឋដែលកំពុងកើតមាននេះផង៕
មតិយោបល់