ភ្នំពេញៈ បុរសម្នាក់ បានឡើងកាប់មែកឈើនៅក្នុងសួនកាណាឌីយ៉ា ក៏ធ្លាក់មែកឈើត្រូវប្តីប្រពន្ធ២នាក់ ដែលជិះម៉ូតូចូល បណ្តាលឲ្យរងរបួសធ្ងន់ កាលពីវេលាម៉ោង៨ព្រឹក ថ្ងៃទី១៨ ខែតុលា ឆ្នាំ២០១៦ នៅត្រង់ចំណុចក្នុងសួនកាណាឌីយ៉ា ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

ប្រភពពីកន្លែងកើតហេតុបានឲ្យដឹងថា មុនពេលកើតហេតុ ខាងក្រុមហ៊ុនសួនកាណាឌីយ៉ាង បានជួលបុរសម្នាក់ឲ្យឡើងកាប់មែកឈើក្នុងសួន​ ខណៈពេលកំពុងតែកាប់ ក៏ស្រាប់តែមានប្តីប្រពន្ធមួយគូជិះម៉ូតូចូលមកខាងក្នុង ត្រូវមែកឈើធ្លាក់សង្កត់លើក្បាល បណ្តាលឲ្យប្រពន្ធរងរបួសធ្ងន់ ចំណែកឯប្តីរងរបួសស្រាល។

បច្ចុប្បន្ន ប្តីប្រពន្ធទាំង២នាក់ត្រូវបានគេបញ្ជូនទៅមន្ទីរពេទ្យដើម្បីសង្គ្រោះ ចំណែកឯបុរសដែលឡើងកាប់មែកឈើត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលចោមចៅ៕