ភ្នំពេញៈ កម្លាំងនគរបាលខណ្ឌចំការមន ធ្វើការឃាត់ខ្លួនបុរសពីរនាក់ និងដកហូតបានថ្នាំញៀនចំនួន២កញ្ចប់តូច ខណៈពេលដែលពួកគេទើបតែនាំគ្នាជិះម៉ូតូមួយគ្រឿងមកពីទិញ ហើយត្រូវបានកម្លាំងចម្រុះដែលបានដាក់គោលដៅអនុវត្តច្បាប់ចរាចរណ៍ផ្លូវគោកនៅពេលយប់បានឃាត់ និងរកឃើញថ្នាំញៀនដែលលាក់ទុកនៅក្នុងហោប៉ៅនោះ។

ការឃាត់ខ្លួននេះដែរបានធ្វើឡើងកាលពីវេលាម៉ោង១០និង១០នាទីយប់ ថ្ងៃទី១៧ ខែ វិច្ឆិកា ឆ្នាំ២០១៦ នៅចំណុចខាងមុខក្លឹបហាត់ប្រាណភ្នំពេញស្ពត ផ្លូវលេខ ២៧១ ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។

តាមប្រភពព័ត៌មានពីនគរបាលបានប្រាប់ឱ្យដឹងថា ជនសង្ស័យទាំងពីរនាក់ដែលបានឃាត់ខ្លួនមាន ទី១ឈ្មោះ សេង ចំរើន អាយុ២៥ឆ្នាំ មុខរបរនិងទីលំនៅមិនពិតប្រាកដ មានស្រុកកំណើតនៅស្រុកបាត់ដំបង ខេត្តបាត់ដំបង និងជនសង្ស័យទី២ឈ្មោះ កែវ សំណាង អាយុ២៩ឆ្នាំ មុខរបរនិងទីលំនៅមិនពិតប្រាកដ មានស្រុកកំណើតនៅភូមិព្រែករំដេង ឃុំព្រៃផ្តៅ ស្រុកបាកាន ខេត្តពោធិ៍សាត់។

តាមប្រភពដដែលបានប្រាប់បន្តទៀតថា មុនពេលកើតហេតុខណៈពេលដែលកម្លាំងចម្រុះរបស់នគរបាលខណ្ឌចំការមន ដាក់គោលដៅចុះអនុវត្តច្បាប់ចរាចរណ៍ផ្លូវគោកនោះ ក៏បានប្រទះឃើញបុរសទាំងពីរនាក់បានជិះម៉ូតូម៉ាក ស្តេប ពណ៌សលាយខ្មៅ ពាក់ស្លាកលេខ បាត់ដំបង 1D-0847 មួយគ្រឿង ដោយមិនមានពាក់មួកសុវត្ថភាពត្រឹមត្រូវទាំងពីរនាក់ ក៏បានធ្វើការហៅសួរនាំ និងធ្វើការឆែកឆេក៏បានប្រទះឃើញថ្នាំញៀនចំនួនពីរកញ្ចប់តូចលាក់ទុកនៅក្នុងហោប៉ៅខោដែលពួកគេទើបតែមកពីទិញយកទៅប្រើប្រាស់ក្នុងតម្លៃ ៣៥ដុល្លារក៏ធ្វើការឃាត់ខ្លួនតែម្តង។

ក្រោយពេលដែលធ្វើការឃាត់ខ្លួនបុរសបុរសទាំងពីរនាក់ រួមទាំងថ្នាំញៀនទាំងពីរកញ្ចប់រួចហើយក៏បាននាំទៅធ្វើការសាកសួរ និងកំណត់ហេតុនៅអធិការដ្ឋាននគរបាលខណ្ឌចំការមន ដើម្បីចាត់ការទៅតាមផ្លូវច្បាប់ជាបន្តទៅទៀត៕