លោក Jurgen Klopp អ្នកចាត់ការក្រុម Liverpool បាននិយាយថាមានក្លឹបជាច្រើនកំពុងតែសំឡឹងឃើញទេពកោសល្យរបស់ខ្សែបម្រើ Philippe Coutinho ហើយថែមទាំងចង់បានកីឡាករជម្រើសជាតិប្រេស៊ីលរូបនេះទៅលេងឱ្យ។

យ៉ាងណាមិញ ទាក់ទិននិងរឿងនេះដែរ Klopp បានបញ្ជាក់បន្ថែមទៀតថាវាមិនទាន់ដល់ពេលដែលកីឡាករវ័យក្មេងរូបនេះត្រូវចាកចេញនោះទេ ពោលគឺអនាគតរបស់គេនៅជាមួយក្រុមហង្សក្រហមជាដើម។ មិនត្រឹមតែម្នាក់នេះទេ សូម្បីកីឡាករឆ្នើមៗទាំងអស់នៅហង្សក្រហមនៅពេលនេះ គឺមិនចង់ចាកចេញពីក្លឹបឡើយ។

“តាមអារម្មណ៍របស់ខ្ញុំនៅពេលនេះ គឺគាត់សប្បាយចិត្តនៅ Liverpool ហើយគ្មាននរណាម្នាក់ចង់ចាកចេញទៅណាទេ។ ឥឡូវអ្នកទាំងអស់គ្នាថាគាត់ជាកីឡាករល្អម្នាក់សម្រាប់ប្រេស៊ីល តែនៅមានពេលវែងឆ្ងាយទៀតសម្រាប់គាត់ ព្រោះទើបតែ២៤ឆ្នាំប៉ុណ្ណោះ។ គាត់នឹងអាចអភិវឌ្ឍខ្លួនខ្លាំងជាងនេះទៀត ក៏ថាបាន”។ Klopp បន្ថែម។

ក្រុមហង្សក្រហម Liverpool នៅពេលនេះ គឺកំពុងឈរនៅកំពូលតារាងលីគកំពូលអង់គ្លេស ដោយមាន២៦ពិន្ទុ លើសក្រុមលេខ២ Chelsea ១ពិន្ទុ។ ខណ:ដែលចុងសប្ដាហ៍នេះ ពួកគេនឹងត្រូវប៉ះជាមួយក្រុម Southampton នៅថ្ងៃសៅរ៍វេលាម៉ោង១០យប់៕