ភ្នំពេញ: កម្លាំងសមត្ថកិច្ចខណ្ឌទួលគោក បានឆ្មក់ចូលបង្រ្កាបល្បែងស៊ីសងកន្ទុយលេខវៀតណាម ដែលបានលួចលេងនៅក្នុងផ្សារនាគមាស ឃាត់ខ្លួនមនុស្សបាន ០៥នាក់។

ប្រតិបត្តិការចុះបង្ក្រាបល្បែងស៊ីសងនេះបានធ្វើឡើងចំនួន០២ គោលដៅ ក្នុងផ្សារនាគមាស សង្កាត់ផ្សារដើមគរ នៅថ្ងៃទី១៩ ខែវិច្ឆិកា ឆ្នាំ២០១៦ វេលាម៉ោង ៣:១៥ នាទីរសៀល ដោយកម្លាំងផ្នែកព្រហ្មទណ្ឌ នៃអធិការដ្ឋាននគរបាល ខណ្ឌទួលគោក ដោយមានការសហការពីនគរបាល ប៉ុស្តិរដ្ឋបាលផ្សារដើមគរ ក្រោមកិច្ចសម្របសម្រួល របស់លោក កែវ សុជាតិ ព្រះរាជអាជ្ញារង នៃអយ្យការ អមសាលាដំបូងរាជធានីភ្នំពេញ បានចុះបង្រ្កាបល្បែង ស៊ីសងខុសច្បាប់ ( កន្ទុយលេខឆ្នោតវៀតណាម ) ប្រព្រឹត្តនៅក្នុងផ្សារនាគមាស ផ្លូវលេខ២៣១ ក្រុមទី ១១ ភូមិ២ សង្កាត់ផ្សារដើមគរ ខណ្ឌទួលគោក រាជធានី ភ្នំពេញ ដោយបង្រ្កាបបានចំនួន០២គោលដៅ។

គោលដៅតូបលេខ១៩០ និងលេខ១៩១ ឃាត់ខ្លួន បានជនសង្ស័យចំនួន ០៤នាក់ ទី១-ឈ្មោះ សុខ ធារី ភេទស្រី អាយុ ៣១ឆ្នាំ ជនជាតិខ្មែរ មុខរបរ លក់បន្លែ ( ជាភ្នាក់ងារស៊ីសង )។ ទី២-ឈ្មោះ ណុច ឈុនលីម ភេទស្រី អាយុ ២២ឆ្នាំ ជន ជាតិខ្មែរ មុខរបរ និស្សិតឆ្នាំទី៤ ( ប្រវត្តិវិទ្យា ) ជាភ្នាក់ងារស៊ីសង។ ទី៣-ឈ្មោះ សុខ ផល្លា ភេទស្រី អាយុ ៥៣ឆ្នាំ ជនជាតិ ខ្មែរ មុខរបរ នៅផ្ទះ ( ជាអ្នកមកចាក់ភ្នាល់ ) និងទី៤-ឈ្មោះ ហេង សុឃាង ភេទប្រុស អាយុ ៣១ឆ្នាំ ជន ជាតិខ្មែរ មុខរបរ បើករថយន្ត ( ជាអ្នកចាក់ភ្នាល់ )។

វត្ថុតាងដែលបានចាប់យករួមមានលុយចំនួន ១៤៧.០០០រៀល, ម៉ាស៊ីនគិតលេខ ចំនួន០២ គ្រឿង , ក្តារចេញលទ្ធផលឆ្នោត ០១ផ្ទាំង , ត្រាថ្ងៃ ខែ ឆ្នាំ ចំនួន ០១ , តុឈើ ចំនួន០១ និងឯកសារកត់ឆ្នោត មួយចំនួន ។ គោលដៅច្រកចូលផ្សារខាងជើង ឃាត់ខ្លួនបានជន សង្ស័យ០១នាក់ឈ្មោះ ឃឹម ដារ៉ាវុធ ភេទប្រុស អាយុ ២១ឆ្នាំ ជនជាតិខ្មែរ មុខរបរ និស្សិតឆ្នាំទី១ ន័តតុន ( ជាភ្នាក់ងារស៊ីសង )។ វត្ថុតាងដែលបានចាប់យកតុឈើ ចំនួន០១, កៅអីជ័រ ចំនួន០៣ , ម៉ាស៊ីនគិត លេខ ចំនួប០១គ្រឿង , ឯកសារកត់ឆ្នោតមួយចំនួន និងលុយចំនួន ២.០០៥.៥០០រៀល។

បច្ចុប្បន្នជនសង្ស័យទាំង០៥នាក់ កំពុងឃាត់ខ្លួនជា បណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅ តុលាការ ចាត់ការតាមផ្លូវច្បាប់៕