កណ្តាល: យុវជនម្នាក់ ត្រូវបានសមត្ថកិច្ចស្រុក កណ្តាលស្ទឹងឃាត់ខ្លួន ក្នុងពេលដែលកំពុងជួញដូរថ្នាំញៀន។ ហេតុការណ៍នេះ បានកើតឡើងនៅវេលាម៉ោង ៩ និង៤៥នាទី ថ្ងៃទី២០ ខែវិច្ឆិកា ឆ្នាំ២០១៦ ចំណុចផ្សារសៀមរាបក្នុងដីភូមិចំបក់ ឃុំសៀមរាប ស្រុកកណ្តាលស្ទឹង ខេត្តកណ្តាល។

ជនសង្ស័យដែលសមត្ថកិច្ចឃាត់ខ្លួននោះ ឈ្មោះថុង ឆារី ភេទប្រុស អាយុ២៨ឆ្នាំមានទីលំនៅភូមិចំបក់ ឃុំសៀមរាប ស្រុកកណ្តាលស្ទឹង ខេត្តកណ្តាល មុខរបរមិនពិតប្រាកដ។ សមត្ថកិច្ចរកឃើញម្សៅក្រាមពណ៌សថ្លាសង្ស័យសារធាតុញៀន ០៣កញ្ចប់តូច និងទុយោជ័រមួយចំនួន បៀរនិងចានអាប៉ោង។

សមត្ថកិច្ចបានឲ្យដឹងថា មុនពេលកើតហេតុថ្ងៃទី១៩ ខែវិច្ឆិកា ឆ្នាំ២០១៦ វេលាម៉ោង០៩នាទីព្រឹក ជនសង្ស័យបានមកផ្ទះឈ្មោះតូ ដើម្បីយកថ្នាំញៀនមកប្រើប្រាស់ និងលក់បន្តតែក្នុងថ្ងៃនេះជនសង្ស័យបានថ្នាំញៀនពីឈ្មោះតូចំនួនពីរកញ្ចប់តូចហើយជនសង្ស័យបានប្រើអស់០១កញ្ចប់នៅសល់០១កញ្ចប់រក្សាទុកនូវខ្លួនឯង ។ លុះដល់ថ្ងៃទី២០ស្អែក វេលាម៉ោង៩.៤៥នាទីព្រឹក មានមនុស្សប្រុស០២នាក់មកទិញថ្នាំញៀននៅផ្ទះរបស់ឈ្មោះតូ ក្នុងពេលនោះជនសង្ស័យក៏នៅទីនោះស្រាប់បានយកថ្នាំញៀនចេញពីផ្ទះឈ្មោះតូចំនួន០១កញ្ចប់តូចយកមកលក់បន្តឲ្យអ្នកទិញដែលខ្លួនមិនស្គាល់ឈ្មោះនៅពេលដែលខ្លួនដើរចេញពីផ្ទះឈ្មោះតូមកជ្រុងផ្ទះពីខាងក្រោយដែលជាកន្លែងស្ងាត់ជនសង្ស័យបានហុចថ្នាំញៀនឲ្យទៅអ្នកទិញតែត្រូវសមត្ថកិច្ចទៅដល់ធ្វើការឃាត់ខ្លួនរួមនឹងថ្នាំញៀន០១កញ្ចប់តូច។

ការឆែកឆេរបានរកឃើញថ្នាំញៀននៅក្នុងផ្ទះ០២កញ្ចប់តូចថែមទៀតបានបញ្ជូនជនសង្ស័យមកអធិការដ្ឋានកសាងសំណុំរឿង ដើម្បីបន្តចាត់ការតាមនិតិវិធី៕