ភ្នំពេញៈ យុវជន២ម្នាក់នាក់ជិះម៉ូតូម៉ាកលេត បានជ្រុលទៅបុករថយន្តដែលចតនៅតាមដងផ្លូវ បណ្តាលឲ្យដួលត្រូវរថយន្តស៊ីនទ្រីកិនយុវជនម្នាក់បែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ។ ហេតុការណ៍ដ៏គួរឲ្យរន្ធត់នេះ បានកើតឡើកាលពីវេលាម៉ោង១២និង៤០នាទី ថ្ងៃទី២១ ខែវិច្ឆិកា ឆ្នាំ២០១៦ នៅតាមបណ្តោយផ្លូវ១៥៦ កែងនឹងផ្លូវ២១១ នៅមុខអគារបុរីកីឡា ស្ថិនៅក្នុងសង្កាត់វាលវង់ ខណ្ឌ៧មករា។

ប្រភពពីកន្លែងកើតហេតុបានឲ្យដឹងថា យុវជនទាំង២នាក់ជាសិស្សសាលាបាក់ទូក បានបើកបរម៉ូតូក្នុងល្បឿនលឿនពេក ក្នុងទិសដៅពីជើងទៅត្បូង ខណៈដែលមកដល់ផ្លូវកែង ក៏ជ្រុលទៅបុកនឹងរថយន្តដែលចតនៅតាមផ្លូវ បណ្តាលឲ្យដួលក៏ខ្ទាតយុវជនម្នាក់ដែលជិះពីក្រោយចូលទៅក្នុងរថយន្តស៊ីនទ្រី កិនបែកក្បាល ចំណែកម្នាក់ទៀតដែលបើកបរម៉ូតូបានលោតចេញផុតទាន់ពេល។

សមត្ថកិច្ចបានឲ្យដឹង​ថា យុវជនរងគ្រោះមានឈ្មោះសុគន្ធ សុធារិទ្ធ អាយុ១៥ឆ្នាំ ជាសិស្សថ្នាក់ទី១០នៃសាលាបាក់ទូក ។ ចំណែក អ្នកបើកឡានស៊ីនទ្រី ឈ្មោះ ទាន់ វណ្ណ អាយុ២៦ឆ្នាំមុខរបរបើកឡានស៊ីនទ្រី ស្នាក់ម្ដុំស្ទឹងមានជ័យ។

បច្ចុប្បន្ន សមត្ថកិច្ចមូលដ្ឋានកំពុងធ្វើការវាស់វែង និងកសាងសំណុំរឿងទៅតាមនីតិវិធីច្បាប់៕