កណ្តាលៈ បើទោះបីយុវត្តីដែលបានយំអង្វរអ្នកម្តាយឲ្យលើកលែងទោសដល់សង្សាររបស់នាងព្រោះតែនាងស្រឡាញ់ខ្លាំងពេក តែម្តាយនាងពុំព្រមទីបំផុតយុវជនជាសង្សារជៀសមិនផុតពីការជាប់គុក។

មន្ត្រីនគរបាលប្រឆាំងបទល្មើសជួញដូរផ្លូវភេទ និងការពារអនិតិជននៃស្នងការនគរបាលខេត្តកណ្តាលបានឲ្យដឹងថា យុវជនម្នាក់ដែលម្តាយខាងស្រីប្តឹងឲ្យចាប់ខ្លួននោះត្រូវបានឃុំខ្លួនហើយកាលពីល្ងាចថ្ងៃសៅរ៍ ទី១៩ ខែវិច្ឆិកា ឆ្នាំ២០១៦។

មន្ត្រីនគរបាលបញ្ជាក់ថា ដីការរបស់តុលាការលេខ២៣៣១ ដ.ក.ឃ.ខ ចុះហត្ថលេខាដោយលោកចៅក្រម ផូង វណ្ណ បានបង្គាប់ឲ្យឃុំខ្លួនឈ្មោះ សំអាត សុខសោភា ភេទប្រុស អាយុ១៨ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ពីបទនាំយកអនីតិជន ជាអាទ៍ចេញដោយមិនស្របច្បាប់ មាត្រា៩ស្តីពីច្បាប់ប្រឆាំងការជួញដូរមនុស្សនិងការពារអនីតិជន។

សូមបញ្ជាក់ថា គូរស្នេហ៍វ័យក្មេងមួយគូរ ស្រលាញ់គ្នាជិត៦ខែ មកហើយដោយសារខាងប្រុសចេះប្រើវិធីលួងខាងកូនស្រីឲ្យចេញពីក្នុងផ្ទះមកជួប រហូតទើបម្តាយខាងស្រីសម្រេចប្តឹងប៉ូលិសឲ្យឃាត់ខ្លួន។ហេតុការណ៍នេះបានកើតឡើងកាលពីវេលាម៉ោង៩និង៣០នាទី ថ្ងៃទី១៨ ខែវិច្ឆិកា ឆ្នាំ២០១៦ នៅក្បែរស្រះទឹក ស្ថិតនៅក្នុងភូមិដើមគរ សង្កាត់ដើមមាន ក្រុងតាខ្មៅ ។

បើតាមនគរបាលបានប្រាប់ឲ្យដឹងថា ជនរងគ្រោះមានឈ្មោះ ល.ម.ល ភេទស្រី អាយុ១៤ឆ្នាំ មានទីលំនៅភូមិតាខ្មៅ សង្កាត់តាខ្មៅ ក្រុងតាខ្មៅ ។ រីឯជនល្មើសមាឈ្មោះ សំអាត សុខសោភា ភេទប្រុស អាយុ១៨ឆ្នាំ មានទីលំនៅភូមិដើមគរ សង្កាត់ដើមមាន ក្រុងតាខ្មៅ ។

នគរបាលបានប្រាប់ឲ្យដឹងទៀតថា នៅមុនពេលកើតហេតុ ម្តាយរបស់ខាងស្រី បានមកដាក់ពាក្យបណ្តឹងឲ្យតាមចាប់ខាងប្រុស ដែលនាំកូនស្រីរបស់គាត់ចេញពីផ្ទះជាច្រើនថ្ងៃមកហើយ ។ ភ្លាមៗនោះនគរបាលក៏ធ្វើការឃាត់ខ្លួនខាងប្រុស(ជនល្មើស) មកធ្វើការសាកសួរ បានសារភាពថា ខ្លួនបានស្រលាញ់គ្នាអស់រយៈពេលជិត៦ខែមកហើយ ហើយតែងតែខាងស្រី រត់តាមខ្លូន និងមកលេងនៅផ្ទះរបស់ខ្លួនថែមទៀតផង តែគ្រាន់តែស្រលាញ់គ្នាចិត្តនិងចិត្តប៉ុណ្ណោះ មិនបានធ្វើអីផ្តេសផ្តាសនោះទេ ។

ចំណែកឯខាងស្រីឈ្មោះល.ម.ល បានប្រាប់ទាំងទឹកភ្នែករលីងរលោងថាខ្ញុំពិតជាបានស្រលាញ់គ្នាពិតមែន ហើយចង់រស់នៅជាមួយគ្នាអស់មួយជីវិត និងសូមឲ្យម្តាយរបស់ខ្លួនដកពាក្យបណ្តឹងឈប់ប្តឹងសង្សាររបស់ខ្លួនទៅ ហើយអ្នកទាំងពីក៏សុខចិត្តឲ្យចាស់ទុំគិតគូរផ្សំផ្គុំ គ្នាផងដែរ។

ម្តាយខាងស្រីអ្នកមីងមិនបញ្ចេញឈ្មោះ បានប្រាប់អ្នកសារព័ត៌មានថា គាត់មកដាក់ពាក្យបណ្តឹងនេះគឺឲ្យនគរបាលចាប់ខ្លួនខាងប្រុស ឈ្មោះ សំអាត សុខសោភា ដែលតែងតែនាំកូនរបស់គាត់ចេញពីផ្ទះរហូត ចំពោះការសំណូមពររបស់កូនស្រីរបស់គាត់ឲ្យដកពាក្យបណ្តឹងនោះ គឺគាត់មិនដកទេពោលគឺឲ្យសមត្ថកិច្ចធ្វើតាមច្បាប់ដោយសារកូនរបស់គាត់នៅក្មេងហើយមិនទាន់គ្រប់អាយុរៀបការឡើយ៕