ភ្នំពេញ: បន្ទាប់ពីមានករណីស្ត្រីម្នាក់ ចូលវះកាត់កែសម្ផស្ស ហើយមានអាការ:ធ្ងន់ធ្ងរ ក៏បានបញ្ជូនទៅកាន់កាន់គ្លីនិកមួយកន្លែងទៀត បណ្ដាលឲ្យស្លាប់នោះ នៅវេលាម៉ោង១២និង២០នាទីថ្ងៃទី២១ ខែវិច្ឆិកា ឆ្នាំ២០១៦ នេះ លោកស្រី ម៉ាក នី ព្រះរាជអាជ្ញារងអយ្យការអមសាលាដំបូងរាជធានីភ្នំពេញ បានសម្រេចបិទ គ្លីនិកកែសម្ផស្សយីហោ ដឺបូតេ ដែលមានទីតាំងស្ថិតនៅចម្ងាយពីរង្វង់មូលកាំកូស៊ីធីប្រមាណ៥០ម៉ែត្រ ច្រកផ្លូវចូលកាំកូស៊ីធី ស្ថិតក្នុងខណ្ឌឫស្សីកែវ រាជធានីភ្នំពេញ ជាបណ្ដោះអាសន្ន។

សូមរំលឹកថា ស្ត្រីម្នាក់ចូលវះកាត់កែសម្ផស្ស នៅគ្លីនិកកែសម្ផស្សយីហោ ដឺបូតេ កាំកូស៊ីធី រហូតមានអាការ:ធ្ងន់ធ្ងរ ក៏បានស្លាប់បាត់បង់ជីវិត ហើយខាងគ្លីនិកដោះដៃមិនទទួលខុសត្រូវមកលើជនរងគ្រោះ។ ហេតុការណ៍នេះបានកើតឡើងកាលពីវេលាម៉ោង៤និង៤០នាទី រសៀលថ្ងៃទី២០ ខែវិច្ឆិកា ឆ្នាំ២០១៦។

ក្រុមគ្រួសារជនរងគ្រោះបានឲ្យដឹងថា បងស្រីរបស់ខ្លួនដែលត្រូវបានខាងគ្លីនិកកែសម្ផស្ស ដឺបូតេ កាំកូស៊ីធី វះកាត់កែសម្ផស្សរហូតដល់ស្លាប់ខាងលើនេះមានឈ្មោះ រស់ សុខនី អាយុ ៣៦ឆ្នាំ ស្នាក់នៅទីរួមខេត្តក្រចេះ។

ប្រភពដដែលបានបន្តថា នៅថ្ងៃទី១៧ ខែវិច្ឆិកា ឆ្នាំ២០១៦ បងស្រីរបស់ខ្លួនមកវះកាត់កែសម្ផស្សនៅគ្លីនិកកែសម្ផស្ស ដឺបូតេ កាំកូស៊ីធី ដែលមានទីតាំងចម្ងាយរង្វង់មូលកាំកូស៊ីធីប្រមាណ៥០ម៉ែត្រ ច្រកផ្លូវចូលកាំកូស៊ីធី ស្ថិតក្នុងខណ្ឌឬស្សីកែវ រាជធានីភ្នំពេញ ។ គាត់បានបន្តថា ក្រោយពីវះកាត់បានរយ:ពេល២ថ្ងៃ នៅថ្ងៃទី១៩ ខែវិច្ឆិកា ឆ្នាំ២០១៦ ស្រាប់តែអាការ:របស់បងស្រីខ្លួនដែលជនរងគ្រោះ កាន់ធ្ងន់ធ្ងរខ្លាំង ស្រាប់តែខាងគ្លីនិកខាងលើ បានដោះដៃដោយមិនទទួលខុសត្រូវលើការវះកាត់របស់ខ្លួននោះទេ និងបានប្រាប់ឲ្យជនរងគ្រោះទៅសង្គ្រោះបន្ទាន់នៅគ្លីនិក ICU ដែលមានទីតាំងស្ថិតនៅផ្ទះ០៥ ផ្លូវ ៤០២ សង្កាត់ទំនប់ទឹក ខណ្ឌចម្ការមន រាជធានីភ្នំពេញ។ លុះមកដល់គ្លីនិក ICU នោះភ្លាម គ្រូពេទ្យក៏បានពិនិត្យតាមវិជ្ជាជីវ:សុខាភិបាល រួចពេទ្យបានប្រាប់គ្រួសារអ្នកជំងឺថា ជនរងគ្រោះដែលជាអ្នកជំងឺមិនអាចរស់បានទេ ព្រោះមេរោគពីការដាក់ថ្នាំសណ្ដំរបស់គ្លីនិក ដឺបូតេ កាំកូស៊ីធី បានស៊ីសួត ថ្លើម តំរងនោម អស់រលីងទៅហើយ រហូតនៅថ្ងៃទី២០ ខែវិច្ឆិកា ឆ្នាំ២០១៦ វេលាម៉ោង៤រសៀល បងស្រីរបស់គាត់ក៏បានដាច់ខ្យល់ស្លាប់តែម្តង៕