ភ្នំពេញ: ជនសង្ស័យម្នាក់ ត្រូវសមត្ថកិច្ចប៉ុស្តិ៍ទួលសង្កែ ធ្វើការឃាត់ខ្លួន ក្រោយពីរូបគេបានជិះម៉ូតូចាស់មកប្តូរយកម៉ូតូថ្មី តែមិនសម្រេច ព្រោះម្ចាស់ម៉ូតូឃើញទាន់ចាប់ប្រគល់ឲ្យសមត្ថកិច្ច។ ករណីឃាត់ខ្លួននេះ ធ្វើឡើងកាលពីវេលាម៉ោង៩និង៣០នាទីព្រឹកថ្ងៃទី២១ ខែវិចិ្ឆកា ឆ្នាំ២០១៦ នៅត្រង់ចំណុចមុខរោងចក្រ រ៉ូស៊ីង ផ្លូវបេតុង ក្រុម៩ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យមានឈ្មោះ ហេង ស៊ីណាត ហៅណាត ភេទប្រុស អាយុ៣០ឆ្នាំ មុខរបរ មិនពិតប្រាកដ មានទីលំនៅផ្ទះជួល ផ្លូវបេតុង ក្រុម១៦ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ។ ចំណែកជនរងគ្រោះឈ្មោះ អ៊ុ សីហាក់ ភេទប្រុស អាយុ២៤ឆ្នាំ មុខរបរ កម្មកររោងចក្រ មានទីលំនៅផ្ទះជួល ផ្លូវលេខ៩០៧ ក្រុម១៦ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ។

សមត្ថកិច្ចបានឲ្យដឹងទៀតថា នៅមុនពេលកើតហេតុ ជនរងគ្រោះបានជិះម៉ូតូទៅធ្វើការនៅរោងចក្រ រ៉ូស៊ីង ដែលស្ថិតនៅតាមបណ្តោយផ្លូវបេតុង ក្រុម១៣ ភូមិទួលសង្កែ សង្កាត់ទួលសង្កែ ក្រោយមកជនរងគ្រោះក៏បានជិះម៉ូតូយកទៅផ្ញើសន្តិសុខដែលយាមនៅរោងចក្រ ដែលជាអ្នកមើលការខុសត្រូវនៅទីនោះ រួមមកជនរងគ្រោះបានបានដើរចូលទៅធ្វើការ។

ក្រោយមក ក៏មានជនសង្ស័យម្នាក់ បានជិះម៉ូតូ មួយគ្រឿង ម៉ាក ហុងដាឌ្រីសង់ សេ១០០ ពណ៌ខ្មៅ ស៊េរី២០០២ ពាក់ស្លាកលេខ ធ ៧៥៣១ ភព១ បានជិះម៉ូតូយកមកផ្ញើនៅកន្លែងខាងលើដែរ ដោយទុកក្បែរម៉ូតូរបស់ជនរងគ្រោះ រួចក៏បានដើរចូលទៅក្នុងរោងចក្របានប្រហែលជា៣០នាទី ក៏បានដើរចេញពីក្នុងរោងចក្រ រួចដើរមកកន្លែងផ្ញើម៉ូតូ ហើយធ្វើសកម្មភាពទាញផ្តាច់ខ្សែភ្លើងកុងតាក់ និងបានទាញផ្តាច់សំបុត្រម៉ូតូរបស់ជនរងគ្រោះចេញ ក៏យកសំបុត្រម៉ូតូរបស់ខ្លួនមកគាបលើម៉ូតូជនរងគ្រោះ។ ស្រាប់តែពេលនោះ ជនរងគ្រោះបានចេញពីក្នុងរោងចក្រមកទិញអីហូម បានឃើញជនសង្ស័យកំពុងធ្វើសកម្មភាពផ្តាច់ខ្សែភ្លើងកុងតាក់ម៉ូតូរបស់ខ្លួន ជនរងគ្រោះបានស្រែកផ្អើលឆោឡោ។ ភ្លាមៗនោះ ក៏ជួបជាមួយកម្លាំងសមត្ថកិច្ចដែលកំពុងជិះល្បាតនៅទីនោះ ក៏ឃាត់ខ្លួនយកមកប៉ុស្តិ៍នគរបាលរដ្ឋបាលទួលសង្កែ ដើម្បីធ្វើការសាកសួរ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចបញ្ជូនទៅឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង បញ្ជូនទៅកាន់តុលាការចាត់ការបន្តតាមផ្លូវច្បាប់៕