អ៊ីរ៉ាក់: អគ្គលេខាធិការរងអង្គការសហប្រជាជាតិ សម្រាប់កិច្ចការជំនួយសង្គ្រោះមនុស្សបន្ទាន់ លោក Stephen O Brien បាននិយាយថា ជនស៊ីវិលប្រមាណ ១,៥ លាននាក់ កំពុងប្រឈមវិបត្តិសង្គ្រាមរវាងយោធា និងភេវរករនៅទីក្រុង Mosul បន្ទាប់ពីនាយករដ្ឋមន្ត្រីអ៊ីរ៉ាក់ បានប្រកាសនៅថ្ងៃច័ន្ទនេះថា នឹងចាប់ផ្ដើមធ្វើប្រតិបតិ្តការយោធាវាយលុក ទៅលើទីក្រុង Mosul ដើម្បីវាយយកទីក្រុងមួយនេះពីពួក ISIS​ មកវិញ។ នេះបើយោងតាមរយ: សារព័ត៌មានអាទ្បាទ្បាំ ចេញផ្សាយនៅថ្ងៃទី១៧ ខែតុលា ឆ្នាំ២០១៦។

លោក Stephen O Brien បានបញ្ជាក់ថា « ខ្ញុំមានការព្រួយបារម្ភយ៉ាងខ្លាំង ចំពោះសុវត្ថិភាពជនស៊ីវិលរហូតដល់ទៅ ១,៥ លាននាក់ កំពុងរស់នៅក្នុងទីក្រុង Mosul ដែលនឹងត្រូវរងផលប៉ះពាល់ ដោយសារការធ្វើសង្គ្រាមនាពេល ខាងមុខនេះ»។

លោក បានបន្តថា ជនស៊ីវិលទាំងនោះ អាចនឹងត្រូវភេវរករយកធ្វើជាខែល ឬគំរាមបាញ់សម្លាប់ ខណ:ពួកគេមានបំណងចង់គេចខ្លួនចេញពីទីក្រុងនេះ។

គួរបញ្ជាក់ថា​ បច្ចុប្បន្នសកម្មប្រយុទ្ធ ISIS​ មានក្រុមអ្នកប្រយុទ្ធ ចន្លោះពី ៣,០០០នាក់ ដល់៩,​០០០នាក់ ដែលកំពុងឈរជើង នៅក្នុងទីក្រុង Mosul៕