កាលពីម្សិលមិញនេះ លោក ស៊ុន ចាន់ថុល បានអញ្ជើញជាអធិបតីក្នុងពិធីចុះហត្ថលេខាលើ កិច្ចព្រមព្រៀងគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង (ព្រែកក្តាម-ធ្លាម្អម) រវាងក្រសួងសាធារណការ និងដឹកជញ្ជូន និងក្រុមហ៊ុនសាងសង់ ដោយមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន តំណាងក្រុមហ៊ុន Sumitomo Mitsui Construction Co., Ltd និងWorld Kaihatsu Kogyo Co., ltd Joint Venture និងតំណាងក្រុមហ៊ុន Hanshin Engineering and Construction Co., Ltd។

គម្រោងផ្លូវនេះមានប្រវែង ១៣៥.២៥គម នឹងគ្រោងចំណាយទឹកប្រាក់សាងសង់អស់ប្រមាណ ២៤៦,៣៥លាន ដុល្លារអាមេរិក ជាប្រភេទផ្លូវ AC ហើយដំណើរការសាងសង់មានរយៈពេល ៤ឆ្នាំ ចែកចេញជាបីកំណាត់ កំណាត់ផ្លូវទី១មាន ប្រវែង៤១.៥៤គម កំណាត់ផ្លូវទី២មានប្រវែង៤២.៥០គម និងកំណាត់ផ្លូវទី៣មាន ប្រវែង ៥១.២០ គម ក្រោមការត្រួតពិនិត្យបទដ្ឋានបច្ចេកទេសពីក្រុមហ៊ុន Katahira & Engineers International (KEI) និងគម្រោងឥណទានសម្បទានពីរដ្ឋាភិបាលជប៉ុនតាមរយៈ ទីភ្នាក់ងារសហប្រតិបត្តិការអន្តរជាតិជប៉ុនប្រចាំនៅកម្ពុជា(JICA)។

គម្រោងផ្លូវនេះជាចំណែកមួយនៃផ្លូវអាស៊ានហាយវេលេខ១ ដែលតភ្ជាប់ពីប្រទេសមីយ៉ាន់ម៉ា ថៃ កម្ពុជា និងវៀតណាម និងជាផ្លូវសេដ្ឋកិច្ចយ៉ាងសំខាន់សម្រាប់ការដឹកជញ្ជូនផលិតផលកសិកម្ម និងជាពិសេស វាជាសរសៃឈាមដ៏ធំមួយ ក្នុងការធ្វើឱ្យសេដ្ឋកិច្ចជាតិកាន់តែមានការអភិវឌ្ឍថែមទៀត។

ឯកឧត្តមទេសរដ្ឋមន្ត្រី បានគូសបញ្ជាក់អំពីការពង្រឹងគុណភាពសាងសង់ និងវិធានការទប់ស្កាត់ការដឹកជញ្ជូនលើសទម្ងន់កម្រិតកំណត់ ដើម្បីធានាបាននូវការប្រើប្រាស់យូរអង្វែង និងបានអំពាវនាវឱ្យអ្នកប្រើប្រាស់ផ្លូវទាំងអស់ឱ្យចូលរួមថែរក្សាទ្រព្យសម្បត្តិជាតិ គោរពច្បាប់ឱ្យបានខ្ជាប់ខ្ជួន និងមិនត្រូវដឹកជញ្ជូនទំនិញលើសទម្ងន់កម្រិតកំណត់ ដែលធ្វើឱ្យខាតបង់ថវិកាជាតិយ៉ាងច្រើនសន្ធឹកសន្ធាប់ឡើយ។

លោក វ៉ា ស៊ឹមសូរិយា អ្នកនាំពាក្យក្រសួងសាធារណការ និងដឹកជញ្ចូនបាន បញ្ជាក់ឱ្យដឹងថា រហូតមកដល់ពេលនេះ ការស្ថាបនា ផ្លូវជាតិលេខ ៥ ចាប់ពី ភ្នំពេញ ទៅ ព្រែកក្ដាម គឺបានរួចរាល់ហើយ ប៉ុន្ដែនៅសល់ បីកង់ទៀត ចាប់ពីព្រែកក្ដាមទៅធ្លាម្អម ពីធ្លាម្អមទៅបាត់ដំបង ពីបាត់ដំបងទៅសិរីសោភ័ណ រហូតដល់ ប៉ោយប៉ែតព្រំដែនកម្ពុជា-ថៃ កំពុងតែដំណើរការស្ថាបនា ដែលនឹងបញ្ចប់ ឱ្យរួចរាល់នៅឆ្នាំ ២០២១ ខាងមុខ។

ផ្លូវជាតិលេខ៥ គឺជាផ្លូវដែលស្ថិតនៅក្នុងហាយវ៉េអាស៊ាន និងជាផ្លូវគោលស្ថិតនៅក្នុងមហាអនុតំបន់ទន្លេមេគង្គ ដែលផ្ដល់នូវសារៈសំខាន់ដោយផ្ដោតលើសកម្មភាពសេដ្ឋកិច្ច ពាណិជ្ជកម្ម និងការដឹកជញ្ជូនផលិតផល កសិផលផ្សេងៗ ដើម្បីតភ្ជាប់ទៅកាន់ប្រទេសក្នុងតំបន់ និងពិភពលោក។

លោកបានអះអាងថា រាជរដ្ឋាភិបាលជប៉ុន បានផ្ដល់ឥណទានសម្បទានក្នុងការស្ថាបនាផ្លូវជាតិ លេខ៥ ចាប់ពីរាជធានីភ្នំពេញ ទៅដល់ ប៉ោយប៉ែតព្រំដែនកម្ពុជា ថៃ ក្នុងនោះរាជរដ្ឋាភិបាលកម្ពុជា បានចូលរួមផ្ដល់ថវិកាបដិភាគ សម្រាប់ដោះស្រាយផល ប៉ះពាល់ដីធ្លី ផ្ទះសម្បែងប្រជាពលរដ្ឋ និងការដោះមីន ដើម្បីរំដោះផ្ទៃដីនៅតាមដងផ្លូវ៕