កាលពីម្សិលមិញនេះ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ចូលរួមក្នុងពិធីបើកការដ្ឋានសាងសង់កំណាត់ផ្លូវជាតិលេខ៥ ចាប់ពីព្រែកក្តាមដល់ធ្លាម្អម។

គម្រោងសាងសង់កំណាត់ផ្លូវជាតិលេខ៥នេះ មានប្រវែងសរុប ១៣៥,២៤គីឡូម៉ែត្រ ចាប់ពីព្រែកក្តាម (ខេត្តកណ្តាល) ដល់ធ្លាម្អម (ខេត្តពោធិ៍សាត់) ដោយឆ្លងកាត់ខេត្តចំនួន០៣ រួមមាន៖ ខេត្តកណ្តាល ប្រវែង ៤,២៥គីឡូម៉ែត្រ ខេត្តកំពង់ឆ្នាំងប្រវែង ៩៣,៥៤គីឡូម៉ែត្រ និងខេត្តពោធិ៍សាត់ប្រវែង ៣៧,៤៥គីឡូម៉ែត្រ ក្រាលបេតុងកៅស៊ូAC មានទិសចរាចរណ៍ចំនួន ៤គន្លង(២គន្លងទៅ ២គន្លងមក) បំពាក់ដោយរនាំងដែកសុវត្ថិភាពចំកណ្តាលសួន។

គម្រោងនេះគ្រោងចំណាយថវិកាសរុបប្រមាណ ២៦១លានដុល្លារអាមេរិក ជាហិរញ្ញប្បទានសម្បទាន ពីរដ្ឋាភិបាលជប៉ុន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផល ប៉ះពាល់ សាងសង់ដោយក្រុមហ៊ុនSumitoto Mitsui Construction Co., Ltd ក្រុមហ៊ុន World Kaihatsu Kogyo Joint Venture និងក្រុមហ៊ុន Hanshin Engineering & Construction Co., Ltd ត្រួតពិនិត្យបច្ចេកទេសសាងសង់ដោយសម្ព័ន្ធក្រុមហ៊ុន Katahira & Engineers International និង Oriental Consultant Global ដោយប្រើរយ:ពេលសាងសង់ចំនួន ៤៨ខែ គិតចាប់ពីខែមេសា ឆ្នាំ២០១៨ រហូតដល់ខែមីនា ឆ្នាំ២០២២។

ការស្តារ និងអភិវឌ្ឍហេដ្ឋារចនាសម្ព័ន្ធដឹកជញ្ជូន បានឆ្លុះ បញ្ចាំងឱ្យឃើញនូវការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសម្រួល ដល់ការដឹកជញ្ជូនផលិតផលក្រុមហ៊ុនវិនិយោគ និងកសិផលបងប្អូនប្រជាពលរដ្ឋមកពីគ្រប់តំបន់នៅ ទូទាំងប្រទេសទៅកាន់ទីផ្សារក្នុងស្រុក និងជាពិសេសទៅកាន់ទីផ្សារអន្តរជាតិ តាមរយ:ច្រកទ្វារព្រំដែន អន្តរជាតិ ប្រកបដោយភាពងាយស្រួល និងចំណាយតិច។

បន្ទាប់ពីសាងសង់រួចរាល់ កំណាត់ផ្លូវជាតិនេះនឹងក្លាយជាផ្លូវមួយប្រកបដោយសក្តានុពលខ្ពស់សម្រាប់ បម្រើវិស័យសេដ្ឋកិច្ចកម្ពុជា ពិសេសអាចកាត់បន្ថយគ្រោះថ្នាក់ និងការកកស្ទះចរាចរណ៍បានយ៉ាងច្រើន ប្រជាពលរដ្ឋតាមដងផ្លូវនេះនឹងមានជីវភាពកាន់តែល្អប្រសើរតាមរយ:កំណើននៃការអភិវឌ្ឍ វិនិយោគ និងទេសចរណ៍ និងជួយជំរុញការនាំចេញអង្ករកម្ពុជាទៅកាន់ទីផ្សារអន្តរជាតិពីខេត្តបាត់ដំបងដែលជាជង្រុកស្រូវដ៏ធំរបស់កម្ពុជាផងដែរ៕