Post News Media អចលន​ទ្រព្យ រោងចក្រស៊ីម៉ង...

រោងចក្រស៊ីម៉ងត៍បាត់ដំបង ខនស៍ ស៊ីមេន បើកសម្ពោធជាផ្លូវការនៅថ្ងៃនេះ

រោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត (Battambang Conch Cement Company Limited) មានទីតាំងនៅតំបន់ភ្នំដូនម៉ាយ ឃុំស្តៅ ស្រុករតន:មណ្ឌល ខេត្តបាត់ដំបង ត្រូវបានសម្ពោធដាក់ឱ្យដំណើរការផលិតស៊ីម៉ងត៍ជាផ្លូវការ នៅថ្ងៃទី៣១ ខែឧសភា ឆ្នាំ២០១៨ នេះតទៅ ក្រោមអធិបតីភាពដ៏ខ្ពង់ខ្ពស់ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា​ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។

រោងចក្រនេះត្រូវបានសង់នៅលើទីតាំងដែលមានផ្ទៃដីសរុបទំហំ ៣១៦ ហិកតា និងប្រើរយ:ពេលសាងសង់ចំនួន ១៨ខែ គិតចាប់តាំងពីចុងឆ្នាំ ២០១៦ ក្នុងគម្រោងទុនវិនិយោគ ប្រមាណ ២៣០លានដុល្លារអាមេរិក ដែលជាការវិនិយោគរួមគ្នារវាងក្រុមហ៊ុន Conch International Holding (HK) Limited និងក្រុមហ៊ុន Battambang KT Cement Co.,Ltd តំណាងដោយអ្នកឧកញ៉ា ស៊ី គង់ទ្រីវ និងលោកឧកញ៉ា វិញ ហួរ។

រោងចក្រស៊ីម៉ងត៍បាត់ដំបង ខនស៍ ស៊ីមេន លីមីតធីត គឺជារោងចក្រដ៏ធំមួយដែលមានបច្ចេកវិទ្យាទំនើប មានសមត្ថភាពផលិតស៊ីម៉ងត៍បានប្រមាណ ៥០០០ តោនក្នុងមួយថ្ងៃ ឬស្មើនឹងជិត ២លានតោនក្នុងមួយឆ្នាំ ហើយក្រុមហ៊ុននឹងផលិតស៊ីម៉ងត៍ចំនួនពីរប្រភេទ គឺនិមិត្តសញ្ញាខនស៍ ពណ៌ក្រហម និងខនស៍ ពណ៌ខៀវ សម្រាប់ផ្គត់ផ្គង់ទីផ្សារក្នុងស្រុក។

សូមបញ្ជាក់ថា​ សព្វថ្ងៃនេះ ព្រះរាជាណាចក្រកម្ពុជាមានរោងចក្រផលិតស៊ីម៉ងត៍ចំនួន៤ កំពុងដំណើរការ ដែលមានសមត្ថភាពផលិតសរុបប្រមាណជិត ៧លានតោនក្នុងមួយឆ្នាំ និងផ្តល់ឱកាសការងារដល់ប្រជាពលរដ្ឋរាប់ពាន់នាក់។

រោងចក្រទីមួយគឺ រោងចក្រកំពត ស៊ីមេន ខូអិលធីឌី (Kampot Cement Co., Ltd) មានទីតាំងនៅ ស្រុកបន្ទាយមាស និងស្រុកដងទង់ ខេត្តកំពត មានសមត្ថភាពផលិតប្រមាណ ២លាន តោនក្នុងមួយឆ្នាំ។

រោងចក្រទីពីរគឺ រោងចក្រ ស៊ីម៉ងត៍ កម្ពុជា ចក្រីទីង (Cambodia Cement Chakreyting Co., Ltd)
មានទីតាំងនៅស្រុកកំពត ខេត្តកំពត មានសមត្ថភាពផលិតប្រមាណ ១,១លាន តោនក្នុងមួយឆ្នាំ។

រោងចក្រទីបីគឺ រោងចក្រ ជីប ម៉ុង អ៊ិនស៊ី ស៊ីមេន ខបភើរេស៊ិន (Chip Mong Insee Cement Corporation) មានទីតាំងនៅស្រុកបន្ទាយមាស ខេត្តកំពត មានសមត្ថភាពផលិតប្រមាណ ២លានតោនក្នុងមួយឆ្នាំ ហើយដែលបានដាក់ឱ្យដំណើរការជាផ្លូវការ កាលពីខែកុម្ភ: ឆ្នាំ២០១៨កន្លងទៅនេះ។
រោងចក្រទីបួនគឺរោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត ដែលបានសម្ពោធដាក់ឱ្យដំណើរការផលិតស៊ីម៉ងត៍ជាផ្លូវការចាប់ពីថ្ងៃនេះតទៅ៕