ជើងខ្លាំងវ័យក្មេង ឯម សុធី បានចាញ់ពិន្ទុកីឡាករថៃ Chuok Phechhit ក្នុងជំនួបមិត្តភាពកាលពីម្សិលមិញ នៅសង្វៀន K-Cment របស់ទូរទស្សន៍អាស៊ីអាគ្នេយ៍។ បរាជ័យនេះត្រូវបានសាម៉ីខ្លួនអះអាងថា មកពីចាញ់កម្លាំង ក្រោយត្រូវអ្នកប្រដាល់ថៃបោកផ្តួលជាច្រើនដង។

ថ្លែងប្រាប់ក្រុមកាងារ Post Sport ក្រោយការប្រកួត កីឡាករវ័យ២០ឆ្នាំរូបនេះបញ្ជាក់ថា គេពិតជាចាញ់កម្លាំងថៃ គួបផ្សំនិងការបោកផ្ទប់សង្វៀនជាញឹកញយធ្វើឲ្យកម្លាំងគេចុះខ្សោយ ពុំអាចដាក់សម្ពាធយកពិន្ទុបានស្រួល។

« និយាយទៅប្អូនចាញ់កម្លាំងគេតែម្តងបង។ ចាប់ពីត្រូវគេបោក ២ ៣ ដងមក ខ្ញុំខ្សោះកម្លាំងតែម្តង ប្រដាល់គឺបែបនេះតែដួលដឹងតែឆាប់អស់ហើយ។ ធ្វើម៉េចទេ បើក្បាច់គេទៀតក៏ល្អដែរ អញ្ចឹងការចាញ់នេះខ្ញុំអស់ចិត្ត សមហើយ។» សម្តីអ្នកប្រដាល់ក្លឹបរឹទ្ធីពោធិ៍សែនជ័យ។

យ៉ាងណាក្តី អ្នកប្រដាល់មិនសូវបានសម្តីរូបនេះបន្ថែមថា នឹងប្រឹងខិតខំហ្វឹកហាត់បន្ថែម ដើម្បីបំពេញបំណងគ្រូនិងអ្នកគាំទ្រ ក្នុងការដណ្តើមជ័យជម្នះនៅប្រកួតក្រោយៗ។

ថ្ងៃជាមួយគ្នា ជើងខ្លាំង ឃីម ឌីម៉ា ក៏បានបំបាក់អ្នកប្រដាល់មុខឌឺ Chheng Krai ដោយពិន្ទុជាឯកច្ឋ័ន្តផងដែរ។