ការបញ្ជាទិញឥវ៉ាន់ដាក់លក់នៅលើអនឡាញតាមទូរស័ព្ទចល័ត បានលោតដល់កំណត់ត្រាថ្មីមួយ មិនធ្លាប់មានពីមុន ក្នុងមួយថ្ងៃនៃពិធីបុណ្យ Thanksgiving។
ក្នុងទិវាបុណ្យប្រពៃណីជាតិរបស់ប្រជាជនអាមេរិកនេះ ការលក់ទំនិញទៅដល់អតិថិជនដែលប្រើប្រាស់ទូរស័ព្ទដៃបញ្ជាទិញតាមប្រព័ន្ធអ៊ីនធើណែតបានហក់ដល់ ១ ពាន់លានដុល្លារ ក្នុងនោះ ផ្សារអនឡាញធំៗរបស់អាមេរិក Amazon, Walmart និង Target ទទួលបានការបញ្ជាទិញខ្ពស់ជាងគេ ក្នុងចំនួនសរុបរហូតដល់ ៧៧១ លានដុល្លារ។ នេះបើយោងតាមរបាយការណ៍ពី Adobe។
ក្រុមហ៊ុនលក់ទំនិញអនឡាញ Amazon បាននិយាយថា ការលក់របស់ខ្លួនតាមទូរស័ព្ទចល័តក្នុងថ្ងៃបុណ្យ Thanksgiving និង Cyber Monday ឆ្នាំនេះ មានការកើនលើសលុបជាងការលក់កាលពីឆ្នាំមុន។ ដូចគ្នានេះដែរ Walmart ថា Thanksgiving គឺជាថ្ងៃដែលផ្សារអនឡាញរបស់ខ្លួន ទទួលបានការបញ្ជាទិញតាមទូរស័ព្ទដៃខ្ពស់បំផុត។
ក្រុមហ៊ុនបន្ថែមថា វាដូចជាការលក់សម្រាប់ Black Friday អីចឹង ដែលមានការលក់បញ្ចុះតម្លៃរហូតដល់ ៧០% សម្រាប់ការកម្ម៉ង់ទំនិញតាមកម្មវិធីលើស្មាតហ្វូនរបស់ខ្លួន ហើយខ្លួនក៏បានផ្តល់នូវការលក់ជាពិសេសមិនធ្លាប់មានពីមុនមកសម្រាប់ពួកគេផងដែរ។
រីឯ Target វិញ ក៏បានទាញយកប្រយោជន៍ពីពិធីបុណ្យនេះផងដែរ ដោយការលក់ទំនិញតាមទូរស័ព្ទចល័តរបស់ខ្លួនក្នុងថ្ងៃ Thanksgiving បានកើនដល់ ៦០% ធៀបនឹងឆ្នាំមុន៕
ប្រភពព័ត៌មាន៖ techchurch
មតិយោបល់