ក្នុងជំនួបវគ្គពាក់កណ្តាលផ្តាច់ព្រ័ត្រពានរង្វាន់ TMCC យប់មិញ ក្រុមភ្ញៀវ Lanexang United បានបង្កើតភាពភ្ញាក់ផ្អើលយ៉ាងខ្លាំង ដោយបំបាក់ក្រុមជើងឯករងឆ្នាំមុនដោយលទ្ធផល ៣-០។ ជោគជ័យជាលើកដំបូងរបស់ក្រុមតំណាងឡាវនេះ ត្រូវបានលោក Leonardo Vitorino គ្រូបង្គោលក្រុម Lanexang United បង្ហើបយុទ្ធសាស្ត្រស្នូលថា កីឡាករបឹងកេតត្រូវការតំបន់ទូលាយដើម្បីលេង ដូច្នេះយប់មិញកូនក្រុមលោកព្យាយាមបង្រួមទីលានយ៉ាងមានប្រសឹទ្ធភាព។

« បឹងកេតជាក្រុមដ៏ល្អ កីឡាករពួកគេមានគុណភាព និងឆន្ទៈខ្ពស់ ប៉ុន្តែចំណុចខ្សោយគឺពួកគេត្រូវការតំបន់ទូលាយដើម្បីលេង។ ប៉ុន្តែខ្ញុំបានប្រាប់កូនក្រុមខ្ញុំហើយ ធ្វើយ៉ាងណាព្យាយាមបង្រួមតំបន់គ្រប់គ្រងបាល់ឲ្យនៅតូច ហើយព្យាយាមប៉ះបាល់អោយបានលឿន ទើបយើងឈ្នះបានដូច្នេះ។ » សម្តីគ្រូ Lanexang ប្រាប់អ្នកសារពត៌មានក្រោយចប់ការប្រកួត។

ជុំវិញបញ្ហានេះលោក ប្រាក់ សុវណ្ណរ៉ា ក៏បង្ហាញទស្សនៈស្រដៀងគ្នាថា Lanexang United អាចចាប់ប្លង់លេងរបស់ក្រុមខ្លួងបានដោយសារកីឡាករលោកមានរបួសច្រើន ហើយត្រូវយកកីឡាករបម្រុងជំនួសដែលប៉ះពាល់ដល់ទម្រង់លេង។

បឹងកេតអង្គរ បានរបូតឱកាសឡើងវគ្គផ្តាច់ព្រ័ត្រជាលើកទី២ ក្រោយចាញ់ក្រុមឡាវ Lanexang United ដោយលទ្ធផល ៣-០ កាលពីយប់មិញ នៅពហុកីឡដ្ឋានជាតិ។ នេះជាលើកដំបូងរបស់ក្រុមតំណាងឡាវ ដែលអាចឡើងទៅវគ្គផ្តាច់ព្រ័ត្រ ពានរង្វាន់កម្រិតតំបន់មួយនេះ តទល់និងក្រុមខ្លាំង Buriram United ។