Mertesacker ប្រធានក្រុម Arsenal បានបញ្ជាក់ថាសមាជិកក្រុមរបស់ខ្លួនមិនទាន់រៀបចំបានល្អនោះទេ ក្នុងការប្រកួតជើងទី២ជាមួយក្រុម Bayern Munich នាវេលាម៉ោង២:៤៥នាទីនេះ នាពានរង្វាន់ UEFA Champions League ។
កាំភ្លើងធំបរាជ័យកាលពីជើងទី១ម្ដងហើយក្នុងលទ្ធផលទក់សាច់ ៥-១ នៅទឹកដីអាល្លឺម៉ង់ ខណៈដែលជើងទី២នារាត្រីនេះ ក្រុមរបស់លោក Wenger រំពឹងថាធ្វើបានល្អវិញ ដើម្បីយកឈ្នះក្រុមខ្លាំងមួយនេះឱ្យបាន។ យ៉ាងណាមិញ មុនការប្រកួតឈានចូលមកដល់នេះដែរ កីឡាករ Mertesacker បែរជាបង្ហាញចំណាប់អារម្មណ៍ប្លែកទៅវិញ ដោយយល់ឃើញថាក្រុមទាំងមូលហាក់មិនទាន់ត្រៀមខ្លួនរួចរាល់សម្រាប់ទទួល Bayern Munich នោះទេ។
“ខ្ញុំគិតថាយើងបានមើលឃើញចំណុចជាច្រើន ដែលបញ្ជាក់ថាយើងពិតជាមិនទាន់បានត្រៀមខ្លួនឱ្យបានល្អក្នុងការប្រកួតប្រជែងធំនេះទេ។ យើងធ្វើមិនបានល្អប៉ុន្មានប្រកួតមកហើយ។ យើងមានបញ្ហាបន្តិចបន្ដួច ប៉ុន្តែយើងត្រូវតាំងអារម្មណ៍មកវិញ ត្រូវប្រាកដថាអ្នកនឹងហ្វឹកហាត់ដល់កម្រិតខ្ពស់បំផុត”។ សម្ដីរបស់ប្រធានក្រុមកាំភ្លើងធំខាងលើបាននិយាយ។
ក្រុម Arsenal តែងតែបរាជ័យនៅពានរង្វាន់ UEFA Champions League នេះដោយជួបជាមួយក្រុម Bayern Munich ប៉ុន្មានរដូវកាលជាប់គ្នាមកហើយ។ ខណៈដែលរដូវកាលនេះអាចនឹងដូចរដូវកាលមុនទៀត ព្រោះអីត្រឹមជើងទី១ ចាញ់ ៥-១ គឺពិតជាពិបាកវាយបកយកឈ្នះដើម្បីឡើងទៅវគ្គបន្ដណាស់៕
មតិយោបល់