នៅក្នុងយប់នេះ ការប្រកួតពានរង្វាន់ Europa League វគ្គ៨ក្រុមនឹងចាប់ផ្តើមប្រកួត នៅវេលាម៉ោង ២​និង៥នាទីរំលងអាធ្រាត្រ។

ក្រុម Anderlecht នឹងបើកទ្វារទទួលក្រុមបីសាចក្រហម Manchester United ដើម្បីបើកឆាកប្រកួតជើងទី១ នៃពានរង្វាន់ក្លឹបលំដាប់ទី២ របស់អ៊ឺរ៉ុប។ Anderlecht លេងនៅក្នុងផ្ទះរបស់ពួកគេ ដូច្នេះហើយ Anderlecht ហាក់មានទំនុកចិត្តច្រើន។ ការប្រកួតកាលពីចុងសប្តាហ៍កន្លងមក Anderlecht​ បានត្រឹមស្មើក្នុងដៃខ្លួនឯងជាមួយនឹងក្រុម Gent។ ចំណែកក្រុមបីសាចក្រហម Manchester United វិញ​ មានការព្រួយបារម្ភច្រើន នៅក្នុងយប់នេះ ព្រោះរៀងរាល់ការប្រកួតក្រៅផ្ទះនៅ Europa League នេះ Manchester United លេងមិនសូវបានល្អឡើយ។ ក៏ប៉ុន្តែ ក្រុម Manchester United កំពុងលេងបានយ៉ាងល្អឡើងវិញ ដោយយកឈ្នះ Sunderland ៣-០ កាលពីចុងសប្តាហ៍កន្លងមក។

នៅក្នុងយប់នេះ ក្រុមទាំងពីរ​ នឹងត្រូវប្រកួតដោយការខិតខំប្រឹងប្រែងរៀងៗខ្លួន ដើម្បីឆក់យកឱកាស នៅក្នុងការលេងជើងទី២បន្តទៀត។ ម្យ៉ាងវិញទៀត​ ក្រុមទាំងពីរ ត្រូវការឈ្នះ ក្នុងការប្រជែងឡើង វគ្គពាក់កណ្តាលផ្តាច់ព្រ័ត្រ Europa League​នេះ។ ក្រៅពីមួយគូនេះ នៅមានជំនួបរវាងក្រុម​ Ajax vs Schalke04, Celta Vigo vs Genk និង Lyon vs Besiktas នៅក្នុងវគ្គ៨ក្រុមចុងក្រោយ Europa League ក្នុងពេលតំណាលគ្នាដែរ៕