បន្ទាប់ពីក្រុម ភ្នំពេញក្រោន ចាញ់ ក្រសួងការពារជាតិ ហៅកាត់ ទ័ព ២ទល់៣ កាលពីថ្ងៃ សៅរ៍ ទី ០៦ ខែ ឧសភា ឆ្នាំ ២០១៧ នៅលើវាលស្មៅនៃកីឡដ្ឋាន ខ.ភ.ម (ស្ដាតចាស់) ក្នុងជំនួបសប្តាហ៍ទី ១០ នៃពានរង្វាន់លីគកំពូលកម្ពុជារដូវកាល ២០១៧។

គ្រូបង្វឹកក្រុមភ្នំពេញក្រោនលោក Oleg Starynskyi បានប្រាប់អ្នកសារពតមានថា ៖ «​ យើងបានរក ២គ្រាប់នាំមុខក្រុមម្ចាស់ផ្ទះមុន វាជាការចាប់ផ្ដើមដ៏ល្អមួយដែលបង្ហាញឲ្យឃើញនូវសមត្ថភាព ក៏ដូចជាបច្ចេកទេសនៃការបញ្ជូនបាល់ ការលែងបាល់វែងៗ ប៉ុន្តែធ្វើបែបនេះកូនក្រុមមានភាពនឿយហត់ខ្លាំងណាស់ បន្ទាប់ពីការនាំមុខ ២-០ ឆន្ទៈនៃការលេងរបស់ពួកគេចាប់ផ្ដើមធ្លាក់ចុះ ហើយពួកគេលែងមានការដាក់សម្ពាធលើគូប្រកួត ស្របពេលខាង ទ័ព មានមាឌធំៗ ហើយកំលាំងខ្លាំងជាង នៅទីបំផុតទម្រង់លេងរបស់ក្រុមទាំងមូលធ្លាក់ចុះខ្សោយ ដែលជាហេតុធ្វើអោយគេវាយបកបាន ៣គ្រាប់វិញ ហើយនេះគឺជាបទពិសោធន៍មួយដ៏ល្អសម្រាប់យុវជនរបស់យើង »។

ភ្នំពេញក្រោន បានធ្លាក់មកនៅចំណាត់ថ្នាក់លេខ ៥ នៃពានរង្វាន់លីគកំពូលកម្ពូជារដូវកាល២០១៧ ដោយប្រកួតបាន ១០ ដង ក្នុងនោះឈ្នះ ៥ដង ស្មើរ ២ដង និងចាញ់ ៣ដង ដោយមាន ១៧ពិន្ទុក្នុងដៃ គិតត្រឹមសប្តាហ៍ទី ១០ នេះ៕