លោក Jose Mourinho អ្នកចាត់ការទូទៅរបស់ក្រុមបីសាចក្រហម Manchester United បានស្នើរសុំប្រធានក្លិបនូវទឹកប្រាក់ប្រមាណជា ១០០លានផោន ដើម្បីនាំយកខ្សែប្រយុទ្ធវ័យ២៣ឆ្នាំ Harry Kane ពីក្រុម Tottenham ជំនួសឲ្យការចំណាយលុយយ៉ាងសម្បើម ក្នុងការទិញយក Ronaldo ។

បើតាម Mirror បានឲ្យដឹងថា លោក Jose Mourinho បានសម្រេចចិត្តដកខ្លួនចេញពីការតាមប្រមាញ់យកកំពូលខ្សែប្រយុទ្ធ Cristiano Ronaldo ពីក្រុមយក្ស Real Madrid ហើយ។ ជាការពិតណាស់ កាលពីប៉ុន្មានថ្ងៃមុនលោក Mourinho ធ្លាប់បានប្រាប់ពីបំណងមិនចង់បាន Ronaldo តាមរយៈការយល់យ៉ាងច្បាស់ពីគំនិតដែលកីឡាករឆ្នើមរូបនេះ ចង់បានដំណោះស្រាយយ៉ាងល្អពី Real Madrid។ ហេតុនេះហើយ អ្នកចាត់ការព័រទុយហ្គាល់រូបនេះ បានសម្រេចចិត្តស្នើរសុំទឹកប្រាក់ត្រឹម ១០០លានផោនប៉ុណ្ណោះ ក្នុងការទិញយកខ្សែប្រយុទ្ធអង់គ្លេស Harry Kane ពីក្រុមមាន់ខ្នាយមាស Tottenham មកជំនួសការចង់បាន Ronaldo វិញ នារដូវក្តៅខាងមុខនេះ។

បើតាម Mirror ដដែលបានឲ្យដឹងបន្ថែមថា លោក Mourinho បានប្រាប់ទៅប្រធានក្លិប Man Utd ថា ការទិញយក Ronaldo គឺមិនប្រាកដថាប្រសើរឡើយ ព្រោះថា Ronaldo មានវ័យកាន់តែចាស់ ហើយម្យ៉ាងវិញទៀតទម្រង់លេង និងល្បឿនរបស់កីឡាករវ័យ ៣២ឆ្នាំរូបនេះ មិនដូចមុនឡើយ។ ចំណែក ការទិញយក Harry Kane វិញ នឹងប្រសើរចំពោះ Man Utd ព្រោះថា កីឡាកររូបនេះ នៅក្មេង និងពោរពេញទៅដោយសមត្ថភាព ម្យ៉ាងវិញទៀត Kane បានឈ្នះស្បែកជើងមាសនៅ Premire League ២រដូវកាលជាប់គ្នាមកហើយ។ ដូចនេះហើយ លោក Jose Mourinho កំពុងតែបញ្ចុះបញ្ចូលប្រធានក្លិប Man Utd ឲ្យទិញយក Harry Kane ជាជាងចំណាយលុយយ៉ាងច្រើនលើសលប់ក្នុងការនាំយក Cristiano Ronaldo ត្រឡប់មកវិញ។ យ៉ាងណាក៍ដោយ លោក Jose Mourinho មិនទាន់បោះបង់មហិច្ចតានាំយកខ្សែប្រយុទ្ធ Alvaro Morata ពីក្រុម Real Madrid ឡើយ។