ខ្សែការពារប៊ែលហ្ស៊ិក វ័យ ៣១ឆ្នាំ​ Thomas Vermaelen កំពុងតែត្រៀមខ្លួនត្រឡប់មកកាន់ក្របខ័ណ្ឌកំពូលរបស់អង់គ្លេស Premire League ។

អតីតខ្សែការពារកណ្តាលដ៍ឆ្នើម របស់ក្រុមកាំភ្លើងធំ Arsenal កីឡាករ Thomas Vermaelen កំពុងត្រូវបានក្រុមជើងខ្លាំងមួយនៅអង់គ្លេស នាំយកត្រឡប់មកវិញ។ បើតាមការចុះផ្សាយ របស់ Daily Mail បានឲ្យដឹងថា ក្រុម Crystal Palace បានសម្លឹងឃើញខ្សែការពារកណ្តាលរូបនេះ យកមកបំពេញនូវតំបន់ការពាររបស់ពួកគេ។

Vermaelen ត្រូវបានផ្លាស់ទៅកាន់ក្រុម Barcelona កាលពីឆ្នាំ ២០១៤ កន្លងមក ក៍ប៉ុន្តែខ្សែការពារដ៍ឆ្នើមរូបនេះ ហាក់មិនសូវបានចូលលេងឲ្យ Barcelona ឡើយ ដោយសារប្រឈមជាមួយនឹងកីឡាករឆ្នើមយ៉ាងច្រើននៅទីនោះ។ ហេតុនេះហើយ កាលពីរដូវកាលមុននេះ ខ្សែការពារប៊ែលហ្ស៊ិករូបនេះ ត្រូវបានខ្ចីជើងទៅកាន់ក្រុម AS Roma នៅក្របខ័ណ្ឌកំពូលរបស់អ៊ីតាលី។ ដោយសារតែទម្រង់លេង របស់ Vermaelen នៅ Roma នៅតែមានភាពល្អប្រសើរ ក្លិបអ៊ីតាលីមួយនេះ មានបំណងចង់រក្សាទុកកីឡាកររូបនេះផងដែរ។ យ៉ាងណាវិញ Vermaelen បានប្រាប់នៅក្នុងសារពត៌មានរបស់អ៊ីតាលីថា រូបគេមានបំណងចង់ត្រឡប់មកកាន់ក្របខ័ណ្ឌកំពូលរបស់អង់គ្លេសវិញ។ ជាមួយគ្នានោះដែរ ក្រុម Crystal Palace កំពុងតែចង់បាន Vermaelen យ៉ាងខ្លាំង។

Crystal Palace បានរៀបចំឯកសាររួចរាល់ហើយ សម្រាប់ស្នើ Barcelona ក្នុងការនាំយក Vermaelen ត្រឡប់មកវិញ។ យ៉ាងណាក៍ដោយ ទាក់ទងទៅនឹងតម្លៃខ្លួន របស់ខ្សែការពារវ័យ ៣១ឆ្នាំរូបនេះនៅមិនទាន់ច្បាស់នៅឡើយនោះទេ។ ដូច្នេះហើយ Thomas Vermaelen នឹងត្រឡប់មកកាន់ Premire League វិញក្នុងពេលឆាប់ៗនេះ។