ក្រុមជើងខ្លាំងអង់គ្លេស Everton បានបើកកីឡារដ្ឋាន របស់ខ្លួនទទួលក្រុម Apollon Limassol ក្នុងជំនួប UEFA Europa League តែមិនទទួលបានលទ្ធផល​ល្អប្រសើរឡើយ ដោយលេងបានត្រឹមស្មើ​ ២-២​ ជាមួយ​ក្រុម​ភ្ញៀវប៉ុណ្ណោះ។

នេះគឺជាសំណាងមិនល្អឡើយ សម្រាប់ក្រុម Everton ក្នុងការបើកទ្វារទទួល ក្រុម Apollon Limassol នាការ​ប្រកួតយប់មិញនេះ។ ជាការពិតណាស់ បើទោះបីជាក្រុម Apollon​ Limassol ទទួលបានកាតក្រហម នៅចុងម៉ោង​នាទីទី ៨៦ ដោយកីឡាករ​ Valentin Roberge ក៍ដោយ តែក្រុមភ្ញៀវ មួយនេះ នៅតែអាចរកគ្រាប់បាល់តាមស្មើចុង​ម៉ោងវិញដដែល។ គួរបញ្ជាក់ផងដែរថា ក្រុម Apollon Limassol បានរកគ្រាប់បាល់នាំមុខមុន នៅនាទីទី១២ ដោយការទាត់បញ្ចូលទីរបស់កីឡាករ Adrian Sardinero Corpa ក៍ប៉ុន្តែ ត្រូវបានតាមស្មើមកវិញ ដោយខ្សែប្រយុទ្ធដ៍ឆ្នើម Wayne Rooney នៅនាទីទី២១​ ដែលធ្វើឲ្យបញ្ចប់ការប្រកួតតង់ទី១​ ក្រុមទាំង២​ មានលទ្ធផល ១-១​។

ឈានចូលដល់តង់ទី២ ក្រុមម្ចាស់ផ្ទះ Everton បានបើកការវាយលុកជាថ្មីម្តងទៀត ដោយអាច​រកគ្រាប់បាល់នាំមុខវិញ នៅនាទីទី ៦៦​ ដោយការទាត់​បញ្ចូលទីរបស់កីឡាករ Nikola Vlasic ។ ក្តីសង្ឃឹមរបស់ Everton ក្នុងការរក៣ពិន្ទុ បានកើតមានឡើង នៅនាទីទី ៨៦​​ ខណៈកីឡាករម្នាក់របស់ក្រុម Apollon Limassol ទទួលបានកាតក្រហម ត្រូវបណ្តេញចេញពីទីលាន ដែល​​ធ្វើឲ្យ Everton មានប្រៀបយ៉ាងខ្លាំងលើក្រុមភ្ញៀវ។ យ៉ាងណាវិញ សំណាងអាក្រក់របស់ក្រុម Everton បាបកើតឡើងនៅនាទីទី ៨៨​ពោលគឺ ២នាទីទីបន្ទាប់ពីកើតមានកាតក្រហម ដែលកីឡាករ Hector Yuste បានស៊ុតតាមស្មើឲ្យក្រុមភ្ញៀវ Apollon Limassol វិញរហូតដល់ចប់ការប្រកួត។

ដូច្នេះហើយ ការបើកទ្វារកីឡារដ្ឋាន ទទួលក្រុម Apollon Limassol របស់ក្រុម Everton បានត្រឹមទទួលលទ្ធផលស្មើគ្នា ២-២​ ប៉ុណ្ណោះ ដោយចែកគ្នា១ពិន្ទុម្នាក់ត្រឡប់ទៅវិញ។

https://www.youtube.com/watch?v=u1UGuIR3XIE