ក្រុមយក្សអ៊ីតាលី Inter Milan កំពុងតែតាមចែរចង់ខ្សែបម្រើអាឡឺម៉ង់ Metzu Ozil ពីក្រុម​កាំភ្លើងធំ Arsenal នៅខែមករាខាងមុខនេះ ស្របពេលដែលសុពលភាពកុងត្រារបស់ Ozil ត្រូវបានបញ្ចប់ ជាមួយ Arsenal ។

ថ្វីត្បិតតែពត៌មានកន្លងមក បានចុះផ្សាយពីដំណើតផ្លាស់ទៅកាន់​ ក្រុមបីសាចក្រហម Manchester United ដោយគ្មានតម្លៃខ្លួនរបស់ Ozil ក៍ដោយ ខណ:ពេលនេះ ក្រុម Inter Milan កំពុងតែចូល​ខ្លួនមកប្រជែង ជាមួយ Man Utd ។ បើតាម Daily Mail បានឲ្យដឹងថា នាយកប្រតិបត្តិក្លិប Inter Milan លោក ​Erick Thorhir មានបំណងចង់បាន Ozil មកកាន់ក្លិបនៅ​ខែមករាខាងមុខនេះ។ ម្យ៉ាងវិញទៀត នាយកប្រតិបត្តិក្លិប Inter Milan រូបនេះ ទំនងជាមិននាំយក Ozil ដោយគ្មាន​តម្លៃខ្លួនឡើយ ព្រោះថា ការធ្វើបែបនេះអាចជាការប្រឈម​នឹងបាត់បង់ Ozil ស្របពេលដែលបីសាចក្រហម Manchester United មានប្រៀបជាង។

យ៉ាងណាវិញ សម្រាប់ក្រុមកាំភ្លើងធំ Arsenal ក៍មិនចង់បាត់បង់ Ozil ដោយទទេរបែបនេះឡើយ ខណ: កាំភ្លើងធំ បានចំណាយ ៤២,៥លានផោន ក្នុងការនាំយក ខ្សែបម្រើអាឡឺម៉ង់រូបនេះ កាលពីឆ្នាំ ២០១៣​ ពីក្រុមយក្សអេស្ប៉ាញ Real Madrid ។ ដូច្នេះហើយ Arsenal មានបំណងចង់បានទឹកប្រាក់​ដែលពួកគេបានចំណាយទិញ Ozil មកវិញ នៅពេលដែល​កីឡាកររូបនេះ ចាកចេញទៅកាន់ក្លិបថ្មី​ ដោយមិនមែនដើរ​ចេញបែបនេះឡើយ។ ម្យ៉ាងវិញទៀត Inter Milan ក៍មិនចង់ឲ្យឱកាសក្នុងការនាំយក Ozil ត្រូវបរាជ័យឡើយ ព្រោះថា Inter Milan មានបទពិសោធន៍​បរាជ័យច្រើន​ណាស់មកហើយ។

សូមរំលឹកផងដែរថា Inter Milan កំពុងស្ថិតក្នុងចំណាត់ថ្នាក់លេខ៣​ ក្នុងតារាង Seria A ដោយមិនទាន់ចាញ់ការប្រកួតម្តងនៅឡើយទេ។