ក្រុមបាល់ទាត់ ដែលកំពុងគ្រងតំណែងកំពូល​តារាងនៅ League1 របស់បារាំង Paris Saint Germain បានបង្ហើបឲ្យដឹងថា ពួកគេនឹងនាំយក Alexis Sanchez នៅរដូវក្តៅក្រោយ បន្ទាប់ពីកីឡាកររូបនេះផុតកុងត្រាជាមួយ​ក្រុមកាំភ្លើងធំ Arsenal ។

នេះគឺជារឿងច្រំដែលមួយ សម្រាប់ក្រុមអ្នកមានបារាំង Paris Saint Germain ក្នុងការបន្តលក់ ខ្សែប្រយុទ្ធ Edinson Cavani បើទោះបីជាបញ្ហាត្រូវបានបញ្ចប់ក៍​ដោយ។ ជាក់ស្តែងណាស់ បើតាមការចុះផ្សាយរបស់​ Mirror បានឲ្យដឹងថា ក្រុម Paris Saint Germain បាន​ដាក់គោលដៅច្បាស់ហើយថា ក្លិបបារាំងមួយនេះ នឹងនាំយក ខ្សែប្រយុទ្ធឈីលី Alexis Sanchez ឲ្យបានពី​ក្រុមកាំភ្លើងធំ Arsenal នៅរដូវក្តៅក្រោយនេះ បន្ទាប់ពីកីឡាកររូបនេះ ផុតកុងត្រាជាមួយក្លិប។

អ្វីដែលគួរឲ្យចាប់អារម្មណ៍នោះគឺ ប្រសិនបើ Paris Saint Germain អាចនាំយក Sanchez បានមែននោះ ខ្សែប្រយុទ្ធឆ្នើមរបស់ពួកគេ នាពេលបច្ចុប្បន្ននេះ Edinson Cavani នឹងត្រូវលក់ចេញជាក់ជាមិនខាន។ ថ្វីបើកម្តៅប្រេះ​ស្រាំ​ នៅ PSG ត្រូវបានរលត់ក៍ដោយ តែក្រុមជើងខ្លាំងបារាំងមួយនេះ ត្រូវការទិញកីឡាករបន្ថែម​ទៀត ដើម្បីពង្រឹងក្លិប ក៍ដូចជាការដណ្តើមពាន Champion League ផងដែរ។ យ៉ាងណាវិញ ការនាំយក Alexis Sanches នេះដែរ​ គឺជាគោលបំណងយ៉ាងធំ របស់ Paris Saint Germain តែវាអាចជះឥទ្ធិពលដល់ Edinson Cavani ផងដែរ ព្រោះថាខ្សែប្រយុទ្ធអ៊ុយរ៉ាហ្គាយ រូបនេះគឺជាកីឡាករប្រយុទ្ធ​យ៉ាងសំខាន់សម្រាប់ក្លិបយូរវស្សាណាស់មកហើយ​ ដែលធ្វើឲ្យក្លិបពិបាកក្នុងការសម្រេចថាដាក់អ្នកណាលេង ទុកអ្នកណាបម្រុង។

ដូច្នេះហើយ ដើម្បីបញ្ចប់វិបត្តិនេះ PSG ត្រូវតែលក់ Cavani ចេញ​នៅពេលទិញបាន Sanchez ដែលការធ្វើបែបនេះ ដើម្បីកុំឲ្យមានការអាក់អន់​ស្រពន់ចិត្តរវាងកីឡាករក្នុងក្លិប ដូចមួយរយៈពេលមុន។