ថ្មីៗនេះ មានសារពត៌មានជាច្រើន បានបង្ហើបឲ្យដឹងថា​ ខ្សែ​បម្រើវ័យក្មេងបារាំង Andrien Rabiot មានបំណងចង់មកលេងនៅ Premier League ក្នុងថ្ងៃណាមួយ។

ជាក់ស្តែងណាស់ បើតាមការឲ្យដឹងពី Talk Sports កីឡាករដែលកំពុងតែសាងភាពល្បីល្បាញ នៅក្រុម Paris Saint Germain ខ្សែបម្រើ Andrien Rabiot ចង់មកលេងឲ្យក្រុមហង្សក្រហម Liverpool ដែលជាក្លិប​ធំមួយនៅអង់គ្លេស។ ជាការពិតណាស់ ប្រភពខាងលើដដែល បានឲ្យដឹងបន្ថែមទៀតថា Rabiot គឺជាអ្នកគាំទ្រផ្កាប់មុខម្នាក់ របស់ Liverpool ដែលកីឡាកររូបនេះ ស្រឡាញ់ និងពេញចិត្តយ៉ាងខ្លាំង ព្រមទាំងចង់មកលេងឲ្យ​ ហង្សក្រហមផងដែរ។

យ៉ាងណាវិញ មកទល់នឹងពេលនេះ Rabiot មិនទាន់បានសម្រេចក្តីបំណងរបស់គេនៅឡើយទេ ក៍ប៉ុន្តែតាមរយ:ទេពកោសល្យ និងភាពល្បីល្បាញរបស់ Rabiot នាពេលបច្ចុប្បន្ននេះ អាចឲ្យរូបគេ ក្លាយជាចំណាប់អារម្មណ៍របស់ Liverpool ជាក់ជាមិនខាន។ ម្យ៉ាងវិញទៀតនោះ ការចង់មកលេងនៅ Premier League របស់កីឡាករវ័យក្មេងបារាំងរូបនេះ កំពុងតែលេចចេញរូបរាងហើយ ព្រោះថា Arsenal និង Spurs រួមទាំង Liverpool ដែលជាក្រុមក្នុងដួងចិត្ត​កីឡាកររូបនេះ ក៍បង្ហាញនូវចំណាប់អារម្មណ៍ ក្នុងការចង់​បានកីឡាកររូបនេះផងដែរ។

ដូច្នេះហើយ មិនយូរទេ Andrien Rabiot ច្បាស់ជាអាចផ្លាស់ពីក្រុម Paris Saint Germain មកលេងឲ្យ Premier League ឬក៍អាចមកកាន់ Liverpool ក៍ថាបាន។