ក្រុមជម្រើសជាតិ បារាំងបានឡើងទៅកាន់វគ្គចែកពូលក្នុង​ព្រឹត្តិការណ៍ World Cup ២០១៨ ហើយក្នុងប្រទេសរុស្ស៊ី ក្រោយពីបានយកឈ្នះក្រុម បេឡារ៉ុស ក្នុងលទ្ធផល ២-១ យប់មិញនេះ។

បារាំង ពិតជាមិនធ្វើឲ្យអ្នកគាំទ្រ របស់ពួកគេរង់ចាំដោយឥត​ប្រយោជន៍ឡើយ ក្នុងការឡើងទៅកាន់វគ្គបន្ត​នៃការប្រកួត​ព្រឹត្តិការណ៍ដ៍សំខាន់នៅឆ្នាំក្រោយនេះ។ ជាក់ស្តែងណាស់​បារាំង បានយកឈ្នះក្រុមជម្រើសជាតិ បេឡារ៉ុស ក្នុងលទ្ធ​ផល ២-១ យ៉ាងប្រថិតប្រថោយ ក្នុងការឡើងទៅកាន់វគ្គ ចែកពូលដ៍សំខាន់នេះ។ ក្នុងនោះដែរ ខ្សែប្រយុទ្ធដ៍ឆ្នើម និងជាទីចាប់អារម្មណ៍របស់ក្លិបធំៗជាច្រើន Antonie Griezmann បានដើរតួយ៉ាងសំខាន់ ក្នុងការប្រកួតនេះ ដោយកីឡាកររូបនេះ អាចស៊ុតបាន១គ្រាប់ និងបោះបាល់​​ឲ្យមិត្តរួមក្រុមទាត់បាន១គ្រាប់ផងដែរ។

Griezmann បាន​ស៊ុតនាំក្តីសង្ឃឹមឲ្យបារាំង ១គ្រាប់មុននៅនាទីទី ២៧ ក្រោយពីការបញ្ជូនបាល់យ៉ាងល្អ របស់កីឡាករ Matuidi បន្ថែមលើនេះ នៅនាទីទី ៣៣ Griezmann បានបោះបាល់យ៉ាងស្អាតឲ្យ ខ្សែប្រយុទ្ធ Oliver Giroud ស៊ុតបាន១គ្រាប់ទៀត ជាហេតុនាំឲ្យ បារាំងធ្វើការនាំមុខ​ បេឡារ៉ុស ក្នុងលទ្ធផល ២-០ មុន។​ ក៍ប៉ុន្តែក្រុម បេឡារ៉ុស តាមបាន១គ្រាប់ពីក្រោយវិញ​ដោយការស៊ុតរបស់កីឡាករ Saroka នៅនាទីទី ៤៤ ដែលធ្វើឲ្យបញ្ចប់តង់ទី១ បារាំងនាំមុខបណ្តោះអាសន្នក្នុងលទ្ធផល ២-១ ។

ឈានចូលដល់តង់ទី២ ក្រុមទាំង២ បានធ្វើការវាយលុកគ្នាវិញបន្តទៀត តែមិនអាចរកគ្រាប់បាល់បញ្ចូលទីបានឡើយ ដោយបញ្ចប់ ៩០នាទីពេញ បារាំងបានត្រឹមយកឈ្នះ បេឡារ៉ុស​ ក្នុងលទ្ធផល ២-១ បន្តឡើងទៅកាន់វគ្គចែក ពូល FIFA World Cup ២០១៨ ក្នុងប្រទេសរុស្ស៊ី ឆ្នាំក្រោយនេះ ខណ:ក្រុម ស៊ុយអ៊ែត ត្រូវរង់ចាំការលេង Play off បន្តទៀត ដើម្បីធានា កៅអីលេងវគ្គចែកពូលដែរ។

ដូច្នេះហើយ បារាំង នឹងឡើងទៅធ្វើការប្រកួតប្រជែងជាមួយក្រុមខ្លាំងៗ មកពីគ្រប់ទ្វីប ដើម្បីដណ្តើមពាន World Cup នៅឆ្នាំក្រោយនេះ ក្នុងប្រទេសរុស្ស៊ី។

//www.youtube.com/watch?v=mzWc9l8bKoM&t=15s