ខ្សែប្រយុទ្ធកំពូល Cristiano Ronaldo កំពុងតែបារម្ភពីអនាគត់របស់រូបគេយ៉ាងខ្លាំង នៅ Real Madrid បន្ទាប់ពីក្រុមអធិរាជស មួយនេះ នៅតែរក្សាជំហរក្នុងការតាមប្រមាញ់ ខ្សែប្រយុទ្ធអង់គ្លេស​ Harry Kane ។

បើតាមការចុះផ្សាយរបស់ Diario Gol ពីប្រទេសអេស្ប៉ាញ បានឲ្យដឹងថា ខ្សែប្រយុទ្ធជួរមុខរបស់ក្រុម Real Madrid កីឡាករ Cristiano Ronaldo ហាក់ដូចជាមិនសប្បាយចិត្តចំពោះ វត្តមានរបស់ Harry Kane នៅ Real Madrid ឡើយ។​ ជាការពិតណាស់ Ronaldo នាពេលបច្ចុប្បន្ននេះ ថ្វីបើលេងធ្លាក់ទម្រង់បន្តិច​មែន​ តែកីឡាករវ័យ៣២ឆ្នាំរូបនេះ នៅតែជាកីឡាករសំខាន់​របស់ក្រុមអធិរាជស ដដែល ក្នុងនាមជាខ្សែប្រយុទ្ធ កំពូលជួរ​មុខ។ ក៍ប៉ុន្តែ​ Ronaldo អាចនឹងកាន់តែអស់ប្រជា​ប្រិយភាព ប្រសិនបើ Harry Kane ផ្លាស់មកកាន់ Real Madrid នោះ ព្រោះថា Kane ប្រព័ន្ទលេងរបស់គេ មិនដូច Karim Benzema និង Gareth Bale ឡើយ ដោយរូបគេជាអ្នកសម្លាប់ មិនមែនជាអ្នកចែកបាល់ឲ្យស៊ុត​ឡើយ ខណៈ Ronaldo ក៍ជាអ្នកសម្លាប់ដូចគ្នា។

ម្យ៉ាងវិញ​ទៀតនោះ Harry Kane មានវ័យក្មេងជាង សន្ទុះនៃការលេង ក៍រឹងមាំ​ និងល្អជាង Ronaldo ដែរ ដែលអាចធ្វើឲ្យ Ronaldo របូតតំណែង ជាក់ជាមិនខាន ប្រសិនបើវត្តមានរបស់ Harry Kane មកកាន់ Real Madrid នោះ។ ដូច្នេះហើយ បើសិនជា Real Madrid នាំយក Harry Kane មកកាន់ Bernabeu នោះ ប្រហែលជា Ronaldo មិនប្រាកដថា បន្តលេងនៅ Real Madrid ទៀតឡើយ។