ខ្សែប្រយុទ្ធឆ្នើម ចាន់ វឌ្ឍនាកា ត្រូវបានដាក់ក្នុងបញ្ជីឈ្មោះក្រុមបឹងកេត សម្រាប់ការប្រកួតដណ្តើមជើងឯក Toyota Mekong Club 2017 (TMCC 2017) ។

ក្រុម បឹងកេត បានបញ្ចប់រដូវកាលឆ្នាំ ២០១៧ ជាមួយនឹងចំណាត់ថ្នាក់លេខ១ ក្នុងវគ្គសន្សំពិន្ទុ នៃក្របខ័ណ្ឌពានរង្វាន់លីគកំពូលកម្ពុជា ដែលផ្តល់ឱ្យពួកគេបានចូលរួមក្នុងពានរង្វាន់ TMCC ជាលើកទី៣ ជាប់ៗគ្នា។ ទោះជាយ៉ាងណាក៏ដោយ វឌ្ឍនាកា មិនអាចមកដល់ទាន់ពេលវេលានោះទេ សម្រាប់ការប្រកួតជើងទី១ របស់ក្រុមបឹងកេតជាមួយក្រុម V-league ក្នុងជុំទី១ ព្រោះតែកីឡាករពូកែជើងឆ្វេងនេះ ត្រូវវិលត្រឡប់មកកាន់ប្រទេសកម្ពុជាវិញមិនទាន់។

អនាគតរបស់កីឡាករវ័យ ២៤ឆ្នាំ នៅតែមិនច្បាស់លាស់បន្ទាប់ពីក្លឹបបាល់ទាត់ជប៉ុន Fujieda MYFC សម្រេចចិត្តមិនបន្តកិច្ចសន្យាជាមួយគាត់។ ម្យ៉ាងវិញទៀតក្រុម Chiangrai United របស់ថៃបានច្រានចោល ក្នុងការចាប់អារម្មណ៍យកទៅលេងនៅក្របខ័ណ្ឌថៃនារដូវកាលក្រោយ៕