បន្ទាប់ពីក្របខ័ណ្ឌ Premier League កាន់តែកក្រើកដោយសារតែក្រុមកំពូលៗរបស់អង់គ្លេស ចាប់ផ្តើមលេងឡើងជើងវិញនោះ បានធ្វើឲ្យកីឡាករល្បីៗ ជាច្រើនចាប់អារម្មណ៍ ក្នុងការផ្លាស់មកកាន់ក្របខ័ណ្ឌកំពូលនៅអឺរ៉ុបមួយនេះ។
ជាក់ស្តែងណាស់ បើតាមការចុះផ្សយរបស់ Marca បានឲ្យដឹងថា ខ្សែបម្រើប្រយុទ្ធអេស្ប៉ាញ ដែលកំពុងតែមានប្រជាប្រិយភាព Marco Asensio កំពុងតែចង់ផ្លាស់មកលេង នៅ Premier League ។ តាមប្រភពខាងលើដដែលនេះ បានឲ្យដឹងបន្ថែមទៀតថា ការចង់ផ្លាស់មកលេងនៅ Premier League នេះដែរ ដោយសារតែ នៅអង់គ្លេសមានការប្រកួតប្រជែងច្រើន ម្យ៉ាងកីឡាករដែលនៅទីនោះ ពោរពេញទៅដោយភាពល្បីល្បាញយ៉ាងខ្លាំង។ បន្ថែមលើនេះ នៅ Real Madrid ថ្វីដ្បិតជាក្រុមខ្លាំងកំពូលមួយនៅអឺរ៉ុបមែន តែកីឡាករល្អៗច្រើនណាស់ ដែលពេលខ្លះធ្វើឲ្យពិបាកក្នុងការប្រជែងយកជម្រើស១១នាក់ដំបូងបាននោះ។
អ្វីដែលជម្រុញឲ្យ Asensio កាន់តែចង់ទៅលេងនៅ Premier League នោះ គឺកីឡាកររូបនេះ កំពុងតែត្រូវបានក្រុមបីសាចក្រហម Manchester United ចាប់អារម្មណ៍ចង់បានផងដែរ។ យ៉ាងណាវិញ វាពិបាកបន្តិច ដែល Real Madrid យល់ព្រមដោះលែងកីឡាករវ័យក្មេងអេស្ប៉ាញរូបនេះ ព្រោះថា សមត្ថភាពរបស់ Marco Asensio មិនចាញ់តារារៀមច្បង Cristiano Ronaldo ឡើយ ជាពិសេសនោះ គឺការទាត់បាល់ពីចម្ងាយប្រកបដោយថាមពល ។ ក៍ប៉ុន្តែព័ត៌មាន ដែលទទួលបានចុងក្រោយនេះ លោក Zinedine Zidane បានបើកផ្លូវឲ្យ Asensio ចាកចេញផងដែរ ដែលនេះមានន័យថា កីឡាករវ័យក្មេងអេស្ប៉ាញរូបនេះ អាចមានសង្ឃឹមក្នុងការផ្លាស់ទៅកាន់ Premier League បាន។
ដូច្នេះហើយ ការសម្រេចចិត្តចង់មកកាន់ Premier League របស់ Marco Asensio នឹងមានពន្លឺ ប្រសិនបើក្រុមស្តេចស Real Madrid យល់ព្រមបើកផ្លូវឲ្យកីឡាកររូបនេះចាកចេញនោះ ខណ:បីសាចក្រហម Manchester United គឺជាក្រុមដែលអាចឆក់យកបេះដូង Asensio បាន។
មតិយោបល់