ក្រុមកាំភ្លើងធំ Arsenal បានត្រៀមរួចរាល់ហើយ ក្នុងការនាំយកខ្សែប្រយុទ្ធបារាំង Karim Benzema ពីក្រុម Real Madrid នៅខែមករាខាងមុខនេះ។

បើតាមការចុះផ្សយរបស់ Daily Star បានឲ្យដឹងថា លោក Arsene Wenger កំពុងតែចង់បានខ្សែប្រយុទ្ធបារាំង Karim Benzema ពីក្រុមអធិរាជស Real Madrid នៅទីផ្សារដោះដូរកីឡាករក្នុងពេលឆាប់ៗនេះ។ ជាការពិតណាស់ លោក Wenger ពិតជាពេញចិត្តយ៉ាង​ខ្លាំងចំពោះទម្រង់លេងរបស់ ខ្សែប្រយុទ្ធបារាំងរូបនេះ ហើយក៍ចង់បាន Benzema ជាយូរណាស់មកហើយ។ ក៍ប៉ុន្តែ ដោយសារតែក្រុម Real Madrid នៅក្រាញននៀល ចង់រក្សាទុកកីឡាកររូបនេះ ទើបធ្វើឲ្យក្រុមកាំភ្លើងធំ Arsenal មិនអាចទិញយកបាន។

យ៉ាងណាវិញនោះ បន្ទាប់ពីក្រុម Real Madrid លេងធ្លាក់ទម្រង់យ៉ាងខ្លាំងនៅរដូវកាលនេះ បានធ្វើឲ្យក្រុម​យក្សអេស្ប៉ាញមួយនេះ នឹងដាក់លក់កីឡាករមួយចំនួនចេញ ដែលក្នុងនោះរួមមាន​ទាំង Karim Benzema ផងដែរ ។ ដោយហេតុនេះហើយ លោក Arsene Wenger បានសម្រេចចិត្តកំណត់តម្លៃក្នុងការទិញ​យក Karim Benzema ពីក្រុម Real Madrid ដោយកំណត់តម្លៃត្រឹម ៣៦លានផោន ក្នងការទិញយក​កីឡាករបារាំងរូបនេះ។

រង់ចាំមើលថា តើលោក Arsene Wenger អាចទិញយក Karim Benzema ពី Real Madrid ក្នុងតម្លៃ ៣៦លានផោន ឬយ៉ាងណា?