ខ្សែប្រយុទ្ធអេហ្ស៊ីប Mohamed Salah របស់ក្រុមហង្សក្រហម Liverpool និងខ្សែប្រយុទ្ធអង់គ្លេស Harry Kane របស់ក្រុម មាន់ខ្នាយមាស Tottenham Hotspur បានក្លាយជាគូប្រកួតប្រកបដោយឥទ្ធិពល ក្រោយពីកីឡាករទាំង២រូប​នេះ ស៊ុតបញ្ចូលទីស្មើគ្នា និងកំពុងឈរកំពូលតារាង Top Scorer នៅ Premier League ដូចគ្នា។

បន្ទាប់ពី Mohamed Salah អាចស៊ុតបញ្ចូលទីលើក្រុម Newcastle United បាន១គ្រាប់យប់មិញនេះ បានធ្វើឲ្យខ្សែប្រយុទ្ធអេហ្ស៊ីប ដែលទិញពីក្រុម Roma មកកាន់​ Liverpool កាលពីរដូវក្តៅកន្លងមកនេះ បានតាមទាន់គ្រាប់បាល់របស់​ម្ចាស់ស្បែកជើងមាស Premier League ២រដូវកាលកីឡាករ Harry Kane ។ ជាក់ស្តែងណាស់ Salah និង Kane ស៊ុតបានម្នាក់ ២៤គ្រាប់ហើយ ដែលតាមពីក្រោយដោយ Sergio Aguero ស៊ុតបាន ២១គ្រាប់ ខណៈ Raheem Sterling ស៊ុតបាន ១៥គ្រាប់ និង Jamie Vardy ស៊ុតបាន១៣គ្រាប់។

ការតាមទាន់នេះដែរ បានធ្វើឲ្យសមរភូមិវាលស្មៅរវាងកីឡាករ​ទាំង២ កាន់តែតានតឹងជាងមុនឡើយ ដោយកីឡាករទាំង២រូបនេះ ត្រូវប្រជែងយ៉ាង​ខ្លាំងក្នុងការដណ្តើមយកស្បែកជើងមាសនៅ Premier League រដូវកាលនេះ ខណៈ Mohamed Salah ចង់ឈ្នះលើកដំបូង ចំណែក Harry Kane វិញ ចង់ឈ្នះស្បែកជើងមាស ៣រដូវកាលជាប់ៗគ្នា។

ដូច្នេះហើយ រង់ចាំមើលថា រវាង Mohamed Salah និង Harry Kane តើកីឡាកររូបណា ហ្នឹងក្លាយជាម្ចាស់​ស្បែកជើងមាស Premier League រដូវកាល ២០១៧-២០១៨ នេះ?