លោក Pep Guadiola គ្រូបង្វឹកក្រុមបាល់ទាត់ Manchester City កំពុងតាមប្រមាញ់កីឡាករមួយរូប​ជាសមាជិករបស់ក្រុម Real Madrid តែមិនមែនកំពូល Super Star ពូកែស៊ុត Cristiano Ronaldo ឡើយ។

បើតាមការចុះផ្សាយរបស់ របស់កាសែត Marca ពីប្រទេសអេស្ប៉ាញ បានឲ្យដឹងថា លោក Pep Guadiola កំពុងតែចាត់ចែងភ្នាក់ងាររបស់ក្លិប ទៅចរចារ​ទិញយកកីឡាករមួយរូប ពីក្រុមអធិរាជស Real Madrid ។ ថ្លែងចំពោះមុខអ្នកសារពត៌មាន លោក Pep Guadiola បានឲ្យដឹងថា លោកចង់បានខ្សែបម្រើប្រយុទ្ធ​អេស្ប៉ាញ Isco មកកាន់ Manchester City នៅរដូវកាលក្រោយនេះ។ ជាការពិតណាស់ គ្រប់គ្នា តែងតែផ្តោតទៅលើ Ronaldo ដែលជាកីឡាករសំណព្វ​ចិត្តរបស់អ្នកគាំទ្រ និងក្លិបជាច្រើនចង់បានកីឡាករពូកែ​ស៊ុតរូបនេះ ក៍ប៉ុន្តែ សម្រាប់លោក Pep វិញ មិនចាប់​អារម្មណ៍ Ronaldo ឡើយ។

លោក Pep Guadiola បានបន្ថែមទៀតថា​ កីឡាករសំខាន់នៅ Real Madrid គឺ Isco ឯណោះទេ ថ្វីបើស៊ុតមិនច្រើនដូច Ronaldo តែទម្រង់លេងរបស់កីឡាករអេស្ប៉ាញរូបនេះ ល្អខ្លាំងណាស់ មិនចាញ់តារារៀមច្បង Andres Iniesta ឡើយ។ ម្យ៉ាងវិញទៀតនោះ Manchester City ត្រូវការកីឡាករដែលមានទម្រង់លេងរហ័សរហួនបែបនេះ ដើម្បីមកជំនួសតំណែងរបស់ David Silva ដែលមាន​វ័យកាន់តែជ្រេទៅហើយនោះ។

ដូច្នេះហើយ នៅរដូវក្តៅ​ខាងមុខនេះ ក្រុម Manchester City មានបំណងនាំយក Isco មកកាន់ Premier League ខណៈក្លិបកំពូលអង់គ្លេសមួយនេះ កំពុងចាត់ចែងភ្នាក់ងារ​របស់ក្លិបទៅចរចារទិញ ពីក្រុមអធិរាជស Real Madrid ហើយ។