គ្រូបង្វឹកក្រុម U16ព្រុយណេ លោក Muhammad Ali Bin លើកឡើងថាក្រុមលោកទាំងមូល បានប្រឹងអស់ពីលទ្ធភាពហើយ ក្នុងជំនួបចាញ់ក្រុមម្ចាស់ផ្ទះកម្ពុជា ២ទល់និង០ កាលពីយប់មិញ។

ក្នុងសន្និសឹទ្ធក្រោយចប់ការប្រកួតគ្រូបង្វឹករូបនេះ បញ្ជាក់ថា ក្រុមលោកលេងស៊ីចង្វាក់គ្នាច្រើន ហើយមិនមានការភ័យខ្លាចការដាក់សម្ពាធពីក្រុមម្ចាស់ផ្ទះឡើយ។ លោកថា ទម្រង់លេងកម្ពុជាមុតស្រួចខ្លាំង ដែលពិបាកក្នុងការរារាំង ប៉ុន្តែកូនក្រុមលោកធ្វើអស់ពីលទ្ធភាពហើយ។

«ខ្ញុំមើលទៅកម្ពុជាមានទម្រង់វាយបកល្អណាស់ ពួកគេមានល្បឿនលឿន ប៉ុន្តែកូនក្រុមខ្ញុំបានធ្វើល្អបំផុតហើយ។ ថ្វីបើចាញ់ ប៉ុន្តែពួកគេបង្ហាញទម្រង់លេងល្អជាងប្រកួតមុនៗ។ កំហុសទាំងអស់ ខ្ញុំនិងព្យាយាមកែប្រែ សម្រាប់ប្រកួតក្រោយទៀត។ សម្តីលោក Muhammad Ali Bin។

បន្ថែមលើនេះគ្រូបង្គោលដដែលក៏បង្ហើបដែរថា ទោះស៊ុតក្រុមខ្លួនបានតែ២គ្រាប់ តែកម្ពុជាលេងល្អជាងទីម័រដែលធ្លាប់ឈ្នះខ្លួន ៣ – ០ ទៅទៀត។

ឆ្លងផុត២ប្រកួតនេះ ព្រុយណេ មិនទាន់បានពិន្ទុឡើយនៅបាតតារាង ខណ:កម្ពុជា ឡើងលេខ១ក្នុងពូល មាន៦ពិន្ទុពេញ។