គ្រូបង្វឹកក្រុមបីសាចក្រហម Manchester United លោក Jose Mourinho បានសម្រេចចិត្តយល់ព្រមបើក​ផ្លូវឲ្យកីឡាករ Luke Shaw ចាកចេញពីក្រុមបីសាចក្រហម ហើយនៅខែមករាខាងមុខនេះ។

បើតាមការចុះផ្សាយរបស់ Daily Mail បានឲ្យដឹងថា លោក Jose Mourinho នឹងមិនបន្តរារាំង Luke Shaw ឲ្យទំនេរនៅ Man Utd ឡើយ ដោយយល់ព្រមដោះលែង​កីឡាកររូបនេះហើយ។ Luke Shaw ក្រោមការដឹកនាំរបស់​លោក Jose Mourinho កីឡាកររូប​នេះ មិនសូវបានបង្ហាញខ្លួនឡើយ សឹងតែអង្គុយមើលគ្រប់​ការប្រកួតទាំងអស់តែម្តង។ មូលហេតុនេះ កើតឡើងដោយសារតែទំនាក់ទំនងរបស់ Shaw និងលោក Mourinho ហាក់មិនចុះសម្រុងនឹងគ្នា តាំងពីដើមរដូវកាល​មុនម្លេះ ខណ:លោក Mourinho ធ្លាប់បានរិះគន់​ពីសមត្ថភាពលេងរបស់កីឡាកររូបនេះផងដែរ។

យ៉ាងណាវិញ Daily Mail បានឲ្យដឹងបន្ថែមទៀតថា ការយល់ព្រមដោះលែង Luke Shaw នេះដែរ ធ្វើឡើងបន្ទាប់ពីទំនាកទំនងរវាង Shaw និងលោក Mourinho បានគ្រាន់បើជាងមុន តែលោក Mourinho នៅតែមិនព្រមប្រើប្រាស់ Shaw ដដែល ដោយយល់ព្រមឲ្យ កីឡាកររូបនេះចាកចេញ នៅខែមករាខាងមុខនេះ។ Shaw ទំនងជាត្រឡប់ទៅ​កាន់ Southampton វិញហើយ ព្រោះថា ក្រុមអង់គ្លេសមួយនេះ ក៍ចាប់អារម្មណ៍ក្នុងការនាំយក Luke Shaw ត្រឡប់ទៅវិញផងដែរ។

ដូច្នេះហើយ នៅខែមករាខាងមុខនេះ Luke Shaw នឹងមានសេរីភាពវិញហើយ ក្នុងការទៅរកទ្រនុំថ្មី ដែលផ្តល់​លក្ខខ័ណ្ឌប្រសើរជាងនៅក្រុម បីសាចក្រហម Manchester United ។