ការប្រកួតពានរង្វាន់យុវជនអាយុក្រោម១៩ឆ្នាំ ប្រចាំតំបន់អាស៊ីអាគ្នេយ៍ AFF U19 Championship នឹងប្តូរមកលេងកម្រិតអាយុក្រោម១៨ឆ្នាំ ( U18 ) វិញនៅឆ្នាំក្រោយ ដោយមីយ៉ាន់ម៉ា ទទួលសឹទ្ធធ្វើជាម្ចាស់ផ្ទះ បន្ទាប់ពីវៀតណាម។

តាមទំព័រផ្លូវការរបស់សហព័ន្ធបាល់ទាត់មីយ៉ាន់ម៉ា បានសរសេរថា តាមរយៈកិច្ចប្រជុំថ្នាក់ដឹកនាំដែលធ្វើឡើងនៅរាជធានីភ្នំពេញ បានកំណត់ប្តូរពី U19 មកលេង U18 វិញ។ បន្ថែមលើនេះ ក៏នឹងមានគម្រោងអញ្ចើញក្លឹបអាជីពពីថៃ ចូលរួមផងដែរ ដើម្បីឲ្យការប្រកួតកាន់តែច្រើន ធ្វើឲ្យយុវជនទទួលបានបទពិសោធន៍កាន់តែច្រើន។

គួរបញ្ជាក់ថា ព្រិត្តិការណ៍ AFF U19 Championship តែងតែធ្វើឡើងរៀងរាល់ឆ្នាំដោយមានប្រទេសក្នុងតំបន់ចូលរួម និងភ្ញៀវអូស្ត្រាលី ដែល AFF អញ្ចើញ។ កាលពីឆ្នាំ២០១៥ ព្រិត្តិការណ៍នេះធ្វើឡើងនៅឡាវ ដោយថៃជាជើងឯក ចំណែកឆ្នាំ២០១៦នេះ ធ្វើនៅវៀតណាម ដោយអូស្ត្រាលី ជាជើងឯក។