ព័ត៌មានបច្ចេកវិទ្យា

Samsung កំពុងចរចាលក់អាជីវកម្មកុំព្យូទ័រទៅ Lenovo

samsung-740x480

ក្រុមហ៊ុន Samsung Electronics កំពុងពិចារណាក្នុងការលក់អាជីវកម្មកុំព្យូទ័ររបស់ខ្លួន ទៅឱ្យក្រុមហ៊ុន Lenovo ក្នុងតម្លៃ ៨៥០ លានដុល្លារ នេះបើយោងតាមរបាយការណ៍ពីប្រព័ន្ធផ្សព្វផ្សាយកូរ៉េខាងត្បូង។

យោងតាមគេហទំព័រ thebell ក្រុមហ៊ុនបច្ចេកវិជ្ជាយក្សកូរ៉េខាងត្បូង កំពុងចរចាលក់អាជីវកម្មកុំព្យូទ័រ ជាមួយសមភាគីចិនរបស់ខ្លួន ដែលជាក្រុមហ៊ុនចែកចាយលក់កុំព្យូទ័រធំជាងគេបំផុតក្នុងពិភពលោក ហើយបើការចរចាបានសម្រេចមែន វានឹងក្លាយជាការលក់អាជីវកម្មមួយទៀតរបស់ក្រុមហ៊ុន Samsung ដែលធ្វើឡើងបន្ទាប់ពីការលក់ម៉ាស៊ីនបោះពុម្ពរបស់ខ្លួន ទៅឱ្យក្រុមហ៊ុន HP ក្នុងតម្លៃ ១ ពាន់លានដុល្លារ និងដែលបានព្រមព្រៀងគ្នាស្រេចបាច់កាលពីខែតុលា។

របាយការណ៍ដដែល បានស្រង់សម្តីមន្រ្តីប្រតិបត្តិជាន់ខ្ពស់ម្នាក់ថា ម៉ាស៊ីនកុំព្យូទ័រ និងម៉ាស៊ីនបោះពុម្ព គួរតែចាត់ចូលក្នុងផ្នែកតែមួយ ហើយវាគួរតែជាអាជីវកម្ម ដែលត្រូវលក់ចេញក្នុងជំហានបន្ទាប់។ ក្រុមហ៊ុន Samsung បាននិងកំពុងលក់ចេញនូវអាជីវកម្មណាដែលខ្លួនជឿថា មិនមែនជាអាជីវកម្មស្នូល ក្នុងផែនការយុទ្ធសាស្រ្តរបស់ខ្លួន និងដែលលែងអាចរកប្រាក់ចំណេញបានតទៅទៀត។

របាយការណ៍នោះបន្ថែមទៀតថា Samsung បានប្រើពេលអស់ប៉ុន្មានខែមកហើយ ក្នុងការចរចាជាមួយ Lenovo ប៉ុន្តែ គេនៅមិនទាន់ច្បាស់ថា ការលក់នេះនឹងទទួលបានសម្រេចជោគជ័យពិតប្រាកដ ឬក៏យ៉ាងណានោះទេ។

គួរបញ្ចាក់ថា ចាប់តាំងពីលេចវត្តមានស្មាតហ្វូនមក ទីផ្សារសម្រាប់កុំព្យូទ័រប្រភេទលើតុ និងយួរដៃ (Notebooks) មានការធ្លាក់ចុះជាបន្តបន្ទាប់ ក្នុងនោះ កុំព្យូទ័រប្រភេទបឈ្ឈរលើតុបានធ្លាក់ចុះរយ:ពេលពីរឆ្នាំមកហើយ៕
ប្រភពព័ត៌មាន៖ zdnet

មតិយោបល់