ព័ត៌មានបច្ចេកវិទ្យា

តើ Yahoo Mail នឹងទៅជាយ៉ាងណាបន្ទាប់ពីលក់ដាច់ឱ្យ Verizon?

នៅថ្ងៃអង្គារ សប្តាហ៍មុននេះ ប្រតិបត្តិការទិញយកក្រុមហ៊ុនអីុនធើណែតយក្ស Yahoo ពីក្រុមហ៊ុន Verizon បានបិទបញ្ចប់ជាផ្លូវការទាំងស្រុងហើយ ជាមួយទឹកប្រាក់ ៤.៥ ពាន់លានដុល្លារ សម្រាប់អាជីវកម្មស្នូលរបស់ក្រុមហ៊ុន រាប់បញ្ចូល Yahoo Mail, Tumblr, Yahoo Finance,​ និង Yahoo Sports

បន្ទាប់ពីការបិទបញ្ចប់មក មានសំណួរជាច្រើនបានចោទសួរថា តើអាសយដ្ឋានអ៉ីម៉ែល Yahoo ដែលមានអ្នកប្រើប្រាស់សកម្មជាង ២២៥ លាននាក់ ជារៀងរាល់ខែ នឹងទៅជាយ៉ាងណា ខណ:នាយកប្រតិបត្តិរបស់ក្រុមហ៊ុន គឺលោកស្រី Marissa Mayer បានលាលែងចេញពីតំណែង ហើយបុគ្គលិកជាង ២០០០ នាក់ ដែលស្មើនឹង ១៥% នៃបុគ្គលិកសរុប ត្រូវបានរំលួសចេញ?

ពីមុនមក Verizon ក៏មានអាសយដ្ឋានសារអេឡិចត្រូនិចផ្ទាល់ខ្លួន ជាមួយអតិថិជនជាង ៤.៥ លាននាក់ ផងដែរ។ ប៉ុន្តែ ក្រោយពីបានទិញយកក្រុមហ៊ុន AOL រួច ក្រុមហ៊ុនក៏សម្រាចរំលាយអាសយដ្ឋានសាររបស់ខ្លួន ក្នុងខែមិនា ចូលជាមួយ AOL Mail ដោយសារតែវាមានប្រជាប្រិយភាព និងចំនួនអ្នកប្រើប្រាស់ច្រើនជាង ដោយពួកគេក៏អាចរក្សាអាសយដ្ឋាន verizon.net ឱ្យនៅដដែល ដោយគ្រាន់តែប្តូរទៅចុះនៅអាសយដ្ឋានថ្មីប៉ុណ្ណោះ។

លោក Chad White ប្រធានដឹកនាំការស្រាវជ្រាវរបស់ក្រុមហ៊ុន Litmus បានប៉ាន់ប្រមាណថា Yahoo Mail នឹងមិនបាត់បង់ពីពិភពអិុនធើណែតនោះទេ ខណ:វាជាប្រព័ន្ធសារអេឡិចត្រូនិចមានប្រជាប្រិយបំផុតលើលោក លំដាប់ទី ៩ គិតត្រឹមខែឧសភា ឆ្នាំ ២០១៧ បើទោះជាវាបានរងការវាយប្រហារយ៉ាងដំណំក្នុងរយ:កាលប៉ុន្មានឆ្នាំចុងក្រោយក្តី។

លោក Chad បានបន្ថែមថា Yahoo Mail នឹងបន្តជីវិតយូរអង្វែងទៀត ហើយម្ចាស់ថ្មី Verizon នឹងពង្រឹង​​ប្រព័ន្ធសន្តិសុខរបស់វាឡើងវិញ ដើម្បីទប់ស្កាត់ការអុកឡុកពីក្រុមចោរព័ត៌មានវិទ្យា។ លោកមិនជឿថា ក្រុមហ៊ុនទូរគមនាគមន៍ដ៏ធំរបស់អាមេរិក នឹងផ្ទេរអតិថិជនពី Yahoo Mail ចូលទៅ AOL Mail ដែលមានចំនួនតិចជាងឆ្ងាយនោះទេ។

ផ្ទុយមកវិញ ក្រុមហ៊ុននឹងធ្វើការច្របាច់អាសយដ្ឋាន និងអតិថិជនសារអេឡិចត្រូនិចទាំងពីរបញ្ចូលគ្នា លើផ្ទាំងកម្មវិធីតែមួយ ដើម្បីប្រកួតប្រជែងលើទីផ្សារប្រព័ន្ធផ្សព្វផ្សាយឌីជីថល ដែលកំពុងនាំមុខគេដោយក្រុមហ៊ុន Facebook និង Google

គួរបញ្ជាក់ថា​ លោក Tim Armstrong ដែលជាអតីតនាយកប្រតិបត្តិក្រុមហ៊ុន AOL នឹងវិលមកដឹកនាំ Yahoo ដែលជ្រោកក្រោមស្លាកក្រុមហ៊ុន Oath ក្នុងមុខតំណែងជា CEO ដដែល៕

 

ប្រែសម្រួលដោយ: សេង

ប្រភពព័ត៌មាន: mediapost

មតិយោបល់