ភ្នំពេញៈ ជនសង្ស័យដែលកម្មករជាងដែកម្នាក់ ត្រូវបានសមត្ថកិច្ចឃាត់ខ្លួន ក្រោយពីធ្វើសកម្មភាពលួចគាស់កេះតុយកគ្រឿងអលង្ការ និងពេជ្រអស់ចំនួនជាង ៣ពាន់ដុល្លារ ហើយក៏ត្រូវម្ចាស់តាមទាន់ចាប់ឃាត់ខ្លួនឲ្យសមត្ថកិច្ចតែម្តង។

ហេតុការណ៍ឃាត់ខ្លួននេះ ធ្វើការឡើងកាលពីវេលាម៉ោង១ យប់រំលងអធ្រាត្រ ឈានចូលថ្ងៃទី២០ ខែមិថុនា ឆ្នាំ២០១៧ នៅចំណុចផ្ទះលេខ ១៤៤កា ផ្លូវលេខ៥៩៨ ក្រុមទី១១ ភូមិទួលគោក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។

ជនសង្ស័យដែលឃាត់ខ្លួននោះមានឈ្មោះ សុទ្ធ រិទ្ធី ភេទប្រុស អាយុ ២២ឆ្នាំ មុខរបរកម្មករផ្សារដែក ស្នាក់នៅផ្ទះកើតហេតុខាងលើ មានស្រុកកំណើតនៅភូមិព្រៃអំបិល ឃុំអំបិល ស្រុកស្អាង ខេត្តកណ្តាល។ ចំណែកឯជនរងគ្រោះមានឈ្មោះ ហ៊ុន ធីដាពៅ ភេទស្រី អាយុ៣០ឆ្នាំ មុខរបរ បុក្គលិកក្រុមហ៊ុន សា្នក់នៅផ្ទះកើតហេតុខាងលើ។

សមត្ថកិច្ចបានប្រាប់ឲ្យដឹងថា មុនពេលកើត ថៅស្រីបានចេញពីផ្ទះទៅធ្វើការនៅក្រុមហ៊ុនបាត់ ចំណែកឯថៅប្រុស និងកម្មករជាងដែកចំនួន ៣នាក់ទៀត បានចេញទៅធ្វើការនៅឯខេត្តកំពត ចំណែកឯជនសង្ស័យដែលឃាត់ខ្លួននោះនៅផ្ទះម្នាក់ឯង ដោយឃើញមានឪកាសល្អ រូបគេបានដើរឡើងទៅលើកបន្ទប់ឡៅតឿ ដោយឃើញទ្វារបន្ទប់ឡៅតឿមិនចាក់សោ ហើយរូបគេបានបើកទ្វារចូលទៅក្នុងបន្ទប់ខាងលើ រួចរូបគេបានទុលរវីសធ្វើសកម្មភាពគាស់កេះតុយកគ្រឿងអលង្ការ ខ្សែកពេជ្រ ក្រវិលពេជ្រ ចិញ្ចៀនពេជ្រ សរុបជាទឹកប្រាក់ជាង ៣ពាន់ដុល្លារ ហើយជនសង្ស័យរូបនោះបានរត់គេចខ្លួនបាត់។

លុះដល់នៅវេលាម៉ោង ៧ យប់ ជនរងគ្រោះបានចេញពីធើ្វការក្រុមហ៊ុនត្រឡប់មកផ្ទះវិញ ក៏បានឡើងទៅបន្ទប់ឡៅតឿ ស្រាប់តែឃើញសញ្ញាប័ត្ររបស់កូននៅលើតុ ទើបរូបគាត់មានការសង្ស័យ ហើយកេះតុមានស្នាមគាស់សោ ក៏ទាញថតតុមើល ស្រាប់តែបាត់សម្ភារៈគ្រឿងអលង្ការដែលទុកនៅក្នុងកេះតុនេះ។ ភ្លាមៗនោះ ថៅស្រី ក៏មានការសង្ស័យទៅជនសង្ស័យខាងលើ ដោយមិនឃើញជនសង្ស័យរូបនេះមិនឃើញដេកនៅបន្ទប់ដូចសព្វដង រហូតដល់វេលាម៉ោង១ យប់រំលងអធ្រាត្រឈានចូលថ្ងៃទី២០ ខែមិថុនា ដោយមានការសង្ស័យធ្លាប់ឃើញជនសង្ស័យខាងលើឧស្សាហ៍ទៅលេងល្បែងអនឡាញនៅដែលនៅក្បែរផ្ទះកើតហេតុ ។ បន្ទាប់មក ស្រាប់តែឃើញជនសង្ស័យខាងលើ កំពុងតែអង្គុយលេងល្បែងអនឡាញនៅទីនោះ ក៏បានចាប់ឃាត់ខ្លួន និងឆែកឆេរខ្លួនរកឃើញគ្រឿងអលង្ការដែលរូបគេធ្វើសកម្មភាពគាស់យក ហើយក៏បានឃាត់ខ្លួនប្រគល់ឲ្យសមត្ថកិច្ចប៉ុស្តិ៍ទួលសង្កែ ដើម្បីធ្វើការសួរនាំ។

ក្រោយពីធ្វើការសាកសួរជនសង្ស័យខាងលើរួចមក រូបគេបានសារភាពថា ខ្លួនពិតជាបានធ្វើសកម្មភាពគាស់យកគ្រឿងអលង្ការ របស់ថៅកែរបស់ខ្លួនពិតប្រាកដមែន។ ចំណែកឯសម្ភារៈខាងលើ ត្រូវបានសមត្ថកិច្ចប្រគល់ជូនទៅម្ចាស់ដើមវិញ។

ជនរងគ្រោះបានប្រាប់ឲ្យដឹងថា ជនសង្ស័យខាងលើ បានមកសុំគាត់ធ្វើការ និងស្នាក់នៅផ្ទះរបស់គាត់ ទើបតែបានជិត មួយខែទេ ដោយគាត់មានការទុកចិត្តជនសង្ស័យខាងលើខ្លាំងពេក ទើបនឹកស្មាន់មិនដល់ឲ្យជនសង្ស័យនៅផ្ទះម្នាក់ឯង ក៏ជនសង្ស័យមានឪកាសល្អធ្វើសកម្មភាពគាស់កេះតុយកគ្រឿងអលង្ការតែម្តងសំណាងល្អរូបគេមិនទាន់បានលក់ បើមិនរកឃើញនៅយប់កើតហេតុនោះទេ ច្បាស់ជារូបគេយកគ្រឿងអលង្ការនោះទៅលក់លេងល្បែងបាញ់អស់បាត់ទៅហើយ។

បច្ចុប្បន្នជនសង្ស័យខាងលើ ត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕