រដ្ឋាភិបាលចិន បានបង្កើនការត្រួតពិនិត្យរបស់ខ្លួនទៅលើភាពយន្ត ប្លុក និងគេហទំព័រអប់រំផ្សេងៗ កាលពីថ្ងៃសុក្រសប្តាហ៍មុន ជាមួយច្បាប់ថ្មី​ដែលចែងថា គេហទំព័រណាដែលមិនអនុលោមតាមតម្លៃស្នូលនៃសង្គមនិយម នឹងត្រូវបិទចោលជាកំហិត។ នេះបើយោងតាមសារព័ត៌មាន Reuters។

ទោះយ៉ាងណា វិធានការណ៍ផ្លូវច្បាប់ចុងក្រោយនេះ គឺផ្តោតជាពិសេសលើការបិទផ្ទប់មាតិកាវីដេអូទាក់ទងទៅ​នឹងភាពយន្តអាសអាភាស សាសនា និងព័ត៌មានណាដែលមានចារឹកជាអវិជ្ជមានក្បត់ជាមួយរដ្ឋាភិបាលមជ្ឈិមបក្សកម្មុយនិសចិនប៉ុណ្ណោះ។

កាលពីថ្ងៃសុក្រមុន អង្គភាព China Netcasting Services Association ដែលជាក្រុមមួយរបស់រដ្ឋបាលក្រុងប៉េកាំង បានប្រកាសដាក់ចេញនូវបទបញ្ញត្តិបង្ហោះផ្សាយមាតិកាព័ត៌មានលើបណ្តាញអិុនធើណែតថ្មី ដែលតម្រូវឱ្យមានអ្នកត្រួតពិនិត្យពីរនាក់ឆែកមើលមាតិកាសោតទស្សន៍ណាដែលប្រកាន់ខ្ជាប់នូវតម្លៃស្នូលនៃសង្គមនិយម។

ក្នុងនោះ មាតិកាភាពយន្ត វីដេអូខ្លីៗ ភាពយន្តឯកសារ កីឡា អប់រំ និងគំនូរជីវចល នឹងក្លាយជាកម្មវត្ថុនៃការត្រួតពិនិត្យ។ ដោយឡែក កម្មវិធីអនឡាញផ្សេងៗដូចជា Weibo ដែលគេហៅថាបណ្តាញ Twitter ចិន នឹងមានការឃ្លាំមើលជាពិសេសបន្ថែមទៀត។

គួររំឭកថា ចិន គឺជាប្រទេសមួយដែលមានការរឹតបណ្តឹងលើសេរីភាពបញ្ចេញមតិនៅលើបណ្តាញអនឡាញ ហើយបណ្តាញសង្គម Facebook មិនត្រូវបានរដ្ឋាភិបាលអនុញ្ញាតឱ្យប្រើប្រាស់ឡើយ៕

ប្រភពព័ត៌មានៈ theverge