កម្មវិធីផ្ញើសារឆ្លងឆ្លើយ (Chat) ដែលមានអាយុកាល ២០ ឆ្នាំរបស់អាមេរិក​ នឹងត្រូវបិទចោលជាស្ថាពរនាថ្ងៃទី ១៥ វិច្ឆិកា ខាងមុខ ក្រោយពីចាប់បើកដំណើរការតាំងពីឆ្នាំ ១៩៩៧ និងបន្ទាប់ពីកម្មវិធីផ្ញើសារ និងបណ្តាញទំនាក់ទំនងសង្គម ដូចជា Facebook និង WhatsApp មានសន្ទុះរីកចម្រើនខ្លាំងមក។

ក្រុមហ៊ុន AOL បានសរសេរនៅលើទំព័រ AIM របស់ខ្លួនថា «យើងដឹងថាមានអ្នកគាំទ្រជាច្រើនដែលបានប្រើប្រាស់សេវាកម្មវិធីផ្ញើសារឆ្លងឆ្លើយរបស់យើងតរៀងមក ហើយយើងស្រឡាញ់ការធ្វើការ និងកសាងកម្មវិធី Chat ដំបូងគេនេះ ចាប់តាំងពីឆ្នាំ ១៩៩៧»។

​តាមរយៈសារមួយផ្ញើទៅកាន់អ្នកប្រើប្រាស់របស់ខ្លួន ក្រុមហ៊ុន AOL បានគូសបញ្ជាក់ថា ទិន្នន័យទាំងអស់របស់អ្នកប្រើប្រាស់ នឹងត្រូវលុបបាត់ក្រោយថ្ងៃទី ១៥ វិច្ឆិកា ប៉ុន្តែ​ សម្រាប់អ្នកដែលប្រើអាសយដ្ឋានអ៊ីម៉ែល @aim.com គឺមិនមានអ្វីប៉ះពាល់នោះទេ។

គួរបញ្ជាក់ថា AOL Instant Messenger កាលពីបង្កើតឡើងដំបូងៗ មានភាពទាក់ទាញសម្រាប់យុវវ័យក្នុងការផ្ញើសារទាក់ទងគ្នាជាមួយមិត្តភក្តិ និងគូសង្សារបស់ពួកគេ។ ប៉ុន្តែដោយសារភាពរីកចម្រើននៃបច្ចេកវិទ្យាចល័ត និងបណ្តាញទំនាក់ទំនងសង្គម​ ធម្យោបាយនៃការទំនាក់ទំនងមានការផ្លាស់ប្តូរយ៉ាងខ្លាំង ដែលធ្វើឱ្យ AOL បាត់បង់ប្រជាប្រិយភាពជាបន្តបន្ទាប់ រហូតដល់សម្រេចបិទចោលប្រតិបត្តិការតែម្តង៕

ប្រភពព័ត៌មានៈ techchrunch