អស់រយៈពេលជាងបីឆ្នាំមកហើយ ដែលក្រុមហ៊ុន Facebook បានចំណាយ ២ ពាន់លានដុល្លារ ទិញ​យក​ក្រុមហ៊ុនបច្ចេកវិទ្យា VR ឈ្មោះ Oculus។ នៅថ្ងៃម្សិល​មិញ ខណៈព្រឹត្តិការណ៍ Oculus Connect លើកទី ៤ នឹងមកដល់នាយប់ថ្ងៃពុធនេះ ប្រធានក្រុមហ៊ុន Facebook លោក Mark Zuckerberg បានចង្អុលបង្ហាញ​ពីមធ្យោបាយផ្សេងៗក្នុងការប្រើប្រាស់ពិភព VR ក្នុងបណ្តាញសង្គមយក្សរបស់ខ្លួន។

តាមរយៈការបង្ហាញ Mark បានចូលទៅកាន់ពិភពនិម្មិត VR ជាមួយប្រធាន​ផ្នែក Social VR នាង Rachel Dwyer ដោយមានការផ្សាយផ្ទាល់លើទំព័រ Facebook ផ្លូវការរបស់ខ្លួន។

អ្នកទាំងពីរបានចេញពីតំបន់មួយទៅកាន់តំបន់មួយ ដោយប្រើរយៈពេលតែមួយពព្រិចភ្នែក។ ចេញពី California ទៅ Puerto Rico រួចបន្តទៅដល់ឋានព្រះចន្ទ ហើយត្រឡប់មកកាន់ឆាកនៅ California វិញ។ ក្នុងនោះ លោកក៏បានប្រាប់ពីវិធីដែលក្រុមហ៊ុន Facebook នឹងប្រើប្រាស់ Machine Learning និងជំនួយការ AI ក្នុងទិសដៅមនុស្សធម៌ផង​ដែរ។

តាមរយៈវីដេអូផ្សាយផ្ទាល់នោះ Mark មិនបានបង្ហើប​​ពីអ្វីដែលខ្លួននឹងធ្វើការប្រកាស ឬធ្វើបទបង្ហាញនៅយប់នេះនោះទេ។ ដូច្នេះ ចង់ដឹងថាតើមហាសេដ្ឋីវ័យក្មេងរូបនេះ នឹងលើកយកអ្វីមកបង្ហាញក្នុងវេទិកា​ Oculus Connect ឆ្នាំនេះ សូមប្រិយមិត្តតាមដានជាមួយ Post Tech នៅថ្ងៃស្អែកបន្តទៀត៕

ប្រភពព័ត៌មានៈ engadget