អ្នកប្រាជ្ញរូបវិទ្យាដ៏ល្បីល្បាញ គឺលោក Stephen Hawking បានទទួលមរណភាពយ៉ាងស្ងប់សុខក្នុងជន្មាយុ ៧៦ ឆ្នាំ ក្នុងគេហដ្ឋានលោក នាទីក្រុង Cambridge នៅប៉ុន្មានម៉ោងមុន។ នេះបើយោងតាមប្រភពព័ត៌មានពី Daily Mail ចេញផ្សាយនៅមុននេះ។

កូនៗរបស់លោក Hawking គឺ Lucy, Robert និង Tim បាននិយាយនៅក្នុងសេចក្តីថ្លែងការមួយថា៖ យើងមានការសោកស្តាយជាពន់ពេកដែលឱពុកជាទីស្រឡាញ់របស់យើងបានលាចាកលោកទៅដោយគ្មានថ្ងៃវិលវិញនៅថ្ងៃនេះ។

សេចក្តីដដែលបន្តទៀតថា៖ គាត់គឺជាអ្នកវិទ្យាសាស្រ្តដ៏អស្ចារ្យ និងជាមនុស្សអច្ឆរិយ:ម្នាក់ ហើយការងារ និងឧត្តម្ភភាពរបស់គាត់ នឹងរស់នៅឋិតថេរជារៀងរហូត។ ភាពក្លាហាន និងអត់ធ្មត់ជាមួយនឹងប្រាជ្ញាស្មារតីដ៏ខ្ពង់ខ្ពស់របស់គាត់ បានក្លាយជាគំរូដ៏ល្អសម្រាប់មនុស្សនៅទូទាំងពិភពលោក។

គាត់បាននិយាយនៅគ្រាមួយថា «ចក្រវាឡនេះ នឹងមិនមានអ្វីច្រើននោះទេ បើវាមិនមែនជាផ្ទះរបស់មនុស្សដែលអ្នកស្រឡាញ់នោះ» យើងនឹងនឹកដល់គាត់ជារៀងរហូត។

គួររំឭកថា​ លោក Stephen Hawking កើតនៅក្នុងឆ្នាំ ១៩៤២ នាទីក្រុង Oxfordshire ហើយបានបន្តការសិក្សានៅឯសកលវិទ្យាល័យ Oxford និង Cambridge។ គាត់បានសរសេរសៀវភៅជាច្រើន និងឈ្នះពាន់រង្វាន់ជាបន្តបន្ទាប់នៅក្នុងអាជីពជាអ្នកវិទ្យាសាស្រ្ត និងរូបវិទ្យាសាស្រ្តរបស់លោក៕