អាមេរិក: ក្រុមហ៊ុន Walt Disney Co បាននឹងកំពុងតែពិភាក្សាជាមួយទីប្រឹក្សាហិរញ្ញវត្ថុ​ក្នុង​គោលដៅ​​ទិញ​បណ្ដាញសង្គម Twitter Inc ខណ:ដែលក្រុមហ៊ុន Saleforce.com Inc កំពុងពិភាក្សាជាមួយ​ធនាគារ​ ដើម្បីទិញ Twitter ដូចគ្នា។

ព័ត៌មាននេះ ត្រូវបានធ្លាយឡើយ ក្រោយពេល Twitter បានប្រកាសថា ខ្លួនមានបំណងចង់លក់​ក្រុមហ៊ុន ហើយមកដល់ពេលនេះមិនមែនមានតែ Disney និង Saleforce.com មួយប៉ុណ្ណោះទេ គឺនៅមាន Microsoft មួយទៀតដែលចង់ទិញយក​ Twitter ប៉ុន្តែសម្រាប់ Facebook គឺមិនមាន​ចំណាប់​អារម្មណ៍នោះទេ។

តាមការវិភាគរបស់ Bloomberg បានឲ្យដឹងថា Disney ប្រហែលជាមានអាទិភាពខ្ពស់ជាងគេ ព្រោះថា បច្ចុប្បន្នលោក Jack Dorsey សហស្ថាបនិក និងជានាយកប្រតិបត្តិ (CEO) របស់ Twitter គឺជា​សមាជិក​ក្រុមប្រឹក្សាភិបាលនៅក្រុមហ៊ុន Disney។

គួរបញ្ជាក់ផងដែរថា Twitter ត្រូវបានបង្កើតឡើងនៅឆ្នាំ ២០០៦ ដោយលោក Jack Dorsey, Evan Williams, Biz Stone និង Glass និងបានក្លាយជាបណ្ដាញសង្គមដ៏មានប្រជាប្រិយភាពនៅឆ្នាំ ២០១២ ជាមួយនឹង​អ្នកប្រើ ១០០លាននាក់ ហើយមកដល់ឆ្នាំ ២០១៦នេះ គឺមានអ្នកប្រើរហូតដល់ ៣១០លាននាក់ បើធៀបនឹង Facebook ឃើញថា ខុសគ្នាឆ្ងាយ ប៉ុន្តែ Twitter ជាបណ្ដាញសង្គមមួយ ដែលគេអាចទុកចិត្តបាន ព្រោះមាន Fake Account តិចបំផុត ខណ:ដែល Facebook មានច្រើនសន្ធឹក៕