យេរូសាឡឹម: បណ្ដាញទំនាក់ទំនងសង្គម Facebook បានចេញមុខសុំអភ័យទោសជាសាធារណ: ក្រោយពេលបិទគណនីអ្នកកាសែត និងបណ្ដាញផ្សព្វផ្សាយព័ត៌មានមួយចំនួននៅក្នុងប្រទេសប៉ាលេស្ទីន។
ការចេញមុខសុំទោសនេះ ត្រូវបានធ្វើឡើងបន្ទាប់ពីមានការតវ៉ាប្រឆាំងទាមទារឲ្យ Facebook បើកគណនីទាំងនោះឡើងវិញ ដោយក្រុមអ្នកតវ៉ារាប់រយនាក់ បានស្នើដល់ Facebook ឲ្យគោរពទៅតាមលក្ខខណ្ឌនៃការប្រើប្រាស់ដែល Facebook បានកំណត់។
«ក្រុមការងាររបស់យើង (Facebook) បានទទួលនូវសេចក្ដីរាយការណ៍រាប់លានក្នុងមួយសប្ដាហ៍ ហើយការបិទគណនីខាងលើ ប្រហែលជាមានអ្វីមួយមិនប្រក្រតី ប៉ុន្តែទោះជាយ៉ាងណា យើងសុំអភ័យទោសចំពោះកំហុសនេះ»។ នេះសំដីរបស់អ្នកនាំពាក្យ Facebook បានថ្លែងប្រាប់សារព័ត៌មាន Al Arabiya English។
ការបិទគណនីខាងលើនេះ ត្រូវបានគេដឹងថា ប្រហែលជាមានការពាក់ព័ន្ធនឹងរដ្ឋាភិបាលប៉ាលេស្ទីន ព្រោះបណ្ដាញសារព័ត៌មានខាងលើ បានចុះផ្សាយនូវព័ត៌មានជាច្រើនដែលរិះគន់ដល់រដ្ឋាភិបាល ជាពិសេសគឺសិទ្ធិសេរីភាពក្នុងការបញ្ចេញមតិ៕
មតិយោបល់