បែបបទរបស់ «Guest Account» ប្រែថា «គណនីប្រើប្រាស់បន្ទាប់បន្សំ» គឺមិនមែនជារឿងមិនល្អនោះទេ៖ សម្រាប់ការបង្កើត Guest Account គឺវាផ្តល់សារ:ប្រយោជន៍ដល់យើងជាច្រើនដូចជា អនុញ្ញាតឲ្យអ្នកដទៃអាចប្រើប្រាស់កុំព្យូទ័ររបស់យើងបានត្រឹមតែចូលលេងអ៊ិនធើណែត ឬបើកកម្មវិធីមួយចំនួនប្រើ ហើយមិនអាចធ្វើអ្វីបានផ្សេងទៀតឡើយ សរុបមកគឺរក្សាសុវត្ថិភាពផ្សេងៗជាចម្បង។ ប៉ុន្តែនៅពេលដែលក្រុមហ៊ុន Microsoft បញ្ចេញ ប្រព័ន្ធប្រតិបត្តិការ Windows 10 ចេញមក ស្រាប់តែអត់ឃើញមានមុខងារ Guest Account។
អ្នកអាចបើកដំណើរការមុខងារនេះវិញបាន តាមរយ:វិធីសាស្រ្តខាងក្រោម៖

1. បើក Start
2. វាយបញ្ចូលពាក្យ CMD
3. ចុច Mouse ស្តាំលើកម្មវិធី Command Prompt រួចជ្រើសយកពាក្យថា Run as administrator រួចចុច Yes ដើម្បីបញ្ជាក់ដំណើរការ
4. វាយបញ្ចូលពាក្យបញ្ជាខាងក្រោម រួចចុច Enter
net user Visitor /add /active:yes
5. សូមចងចាំថា អ្នកជ្រើសយកពាក្យថា Visitor គឺជាឈ្មោះគណនីអ្នកប្រើប្រាស់ ប៉ុន្តែសម្រាប់ពាក្យ Guest គឺត្រូវបានជ្រើសយកដោយ Windows 10 ហើយអ្នកមិនអាចប្រើប្រាស់វាទៀតបានទេ។ យ៉ាងណាក្តី អ្នកក៏អាចដាក់ឈ្មោះផ្សេងក្រៅពី Visitor ដោយសេរី គ្រាន់តែដាក់ខ្លីបានហើយ។
6.វាយបញ្ចូលពាក្យបញ្ជាខាងក្រោម ដើម្បីបង្កើតលេខកូដសម្ងាត់ សម្រាប់គណនីដែលបង្កើតថ្មី រួចចុច Enter
net user Visitor *
7. អ្នកអាចដាក់លេខកូដសម្ងាត់ ឬមិនដាក់ក៏បាន ដោយគ្រាន់តែចុច Enter ២ដង គឺស្មើនឹងគ្មានលេខកូដបញ្ចូល។

8. វាយបញ្ចូលពាក្យបញ្ជាខាងក្រោម ដើម្បីជាការលុបចោលគណនីដែលបានបង្កើតថ្មី ចេញពីក្រុមគណនីប្រើប្រាស់ជាផ្លូវការ រួចចុច Enter។
net localgroup users Visitor /delete
9. វាយបញ្ចូលពាក្យបញ្ជាខាងក្រោម ដើម្បីដាក់បញ្ចូលគណនីបង្កើតថ្មីទៅក្នុងក្រុមគណនីប្រើប្រាស់បន្ទាប់បន្សំ រួចចុច Enter
net localgroup guests Visitor /add
10. សូមចាកចេញ ឬក៏បិទចោលកម្មវិធី Command Prompt ដើម្បីបញ្ចប់កិច្ចការត្រឹមនេះ។

ដំណើរការតាមរយ:វិធីខាងលើ ជាការបង្កើតគណនីស្តង់ដារមួយ ប៉ុន្តែក៏បានធ្វើការលុបចេញពីក្រុមប្រើប្រាស់ជាផ្លូវការ និងបានដាក់បញ្ចូលទៅក្នុងក្រុមអ្នកប្រើប្រាស់បន្ទាប់បន្សំ បានសេចក្តីថា គណនីដែលបានបង្កើតថ្មីនេះ គឺរាល់សិទ្ធិដែលប្រើប្រាស់កុំព្យូទ័រ គឺដូចគ្នាទៅនឹង Guest Account ដែលមាននៅលើ Windows ស៊េរីចាស់អីចឹង។
ក្រោយបញ្ចប់ការអនុវត្តន៍ អ្នកចាំបាច់គ្រាន់តែចាកចេញពី (Sign out) គណនីបច្ចុប្បន្ន ហើយនៅពេលដែលលោតផ្ទាំង Sign in ចេញមក សូមជ្រើសរើសយក គណនី Visitor ហើយចុចប៊ូតុង Sign in ដោយពុំបាច់វាយលេខកូដសម្ងាត់ ដោយសារតែមិនបានដាក់ពេលបង្កើត។
ឥឡូវនេះគណនីដែលបានប្រើប្រាស់បន្ទាប់បន្សំត្រូវបានបង្កើតរួចរាល់ ហើយពេលនេះអ្នកអាចចែករំលែកកុំព្យូទ័រទៅកាន់មិត្តភក្តិ ឬភ្ញៀវឲ្យប្រើបានដោយសុវត្ថិភាព។ ពួកគេអាចប្រើប្រាស់បានដូចជា អ៊ិនធើណែត និងបើកប្រើកម្មវិធីមួយចំនួន ប៉ុន្តែគេមិនអាចកែប្រែការកំណត់ណាមួយក្នុងកុំព្យូទ័របានឡើយ ហើយមិនអាចធ្វើការលុប ឬដំឡើងកម្មវិធី រួមទាំងមិនអាចចូលទៅកាន់ឯកសាររបស់អ្នកបានជាដាច់ខាត។
ប្រសិនបើអ្នកលែងត្រូវការប្រើប្រាស់គណនីបន្ទាប់បន្សំនេះហើយ អ្នកអាចធ្វើការលុបវាចោលបានដោយចូលទៅកាន់ Settings > Accounts > Family & other people រួចជ្រើសរើសយក Visitor Account ហើយចុចយកពាក្យថា Remove ជាចុងក្រោយចុចលើប៊ូតុង Delete account and data៕