ស្ពានហាលឆ្លងទៅប្រាសាទអង្គរវត្ត នឹងផ្អាកចរាចរណ៍ទាំងស្រុង ជំនួសដោយស្ពានបណ្តែតទឹក ដើម្បីធ្វើការជួសជុលឡើងវិញ។ នេះបើយោងតាមសេចក្តីជូនដំណឹងរបស់អាជ្ញាធរជាតិអប្សរា ចេញផ្សាយកាលពីម្សិលមិញនេះ។

អាជ្ញាធរជាតិអប្សរា មានកិច្ចសហការជាមួយសាកលវិទ្យាល័យសូហ្វីយ៉ាប្រទេសជប៉ុន នឹងធ្វើការងារជួសជុលស្ពានហាលប្រាសាទអង្គរវត្ត ដំណាក់កាលទី ២ ដែលតម្រូវឲ្យបិទចរាចរណ៍ទាំងស្រុង។

ស្ពានបណ្តែតទឹកបណ្តោះអាសន្ន សម្រាប់ជំនួសស្ពានហាល នឹងត្រូវចាប់ផ្តើមសង់នៅចុងខែវិច្ឆិកា ឆ្នាំ ២០១៦ ដល់ចុងខែឧសភា ឆ្នាំ ២០១៧។

ដូច្នេះភ្ញៀវទេសចរណ៍ជាតិ នឹងអន្តរជាតិ អាចឆ្លងកាត់ទៅទស្សនាប្រាសាទអង្គរវត្ត ដោយប្រើប្រាស់ស្ពានបណ្តែតទឹក ដែលស្ថិតនៅខាងត្បូងស្ពានហាលជំនួសវិញ ដើម្បីបញ្ជៀសនូវហានិភ័យ ដោយសារជួសជុល។

គួរបញ្ជាក់ដែរ គម្រោងបិទចរាចរណ៍ស្ពានហាល គឺដើម្បីអនុវត្តន៍គម្រោងជួសជុលប្រាសាទអង្គរវត្តឡើងវិញ ដែលដំណាក់កាលទី ១ ធ្លាប់បានធ្វើឡើងកាលពីឆ្នាំ ១៩៩៦ ដល់ ឆ្នាំ ២០០៧ ហើយដំណាក់ទី ២ នេះ អាចនឹងចាប់ផ្តើមនៅឆ្នាំក្រោយ នឹងបញ្ចប់នៅឆ្នាំ ២០២០៕